Şaredarîya Amedî ya Şaristanê Girdî, seba ke şar bieşko werdêkê weşî bigîro, 7 aşmanê peyênan de 6 hezar û 500 cayê karî kontrol kerdî, pêro pîya 2 tonî ra vêşêr werdê xeripîyayeyî û werdêkê ke tarîxê ci vîyarto îmha kerdî û 10 hezar kesî rê perwerdeyê karî da.

Ekîbê Kontrolê Xidayan yê girêdayeyê Serekîya Daîreya Karê Weşîye, cayê ke raşteraşt eleqedarê weşîya şarî yê sey restoran, kafe, çayxane, lokanta, şîrindarî û tesîsan de kontrolê werdan dewam kenê.

Ekîbî ke wareyê Koordînasyonê Kontrolê Xidayan yê sazkerdeya rayberîya Serekîya Daîreya Karê Weşîye de xebatanê kontrol û perwerdeyî zêde kerdê, verê merkezê şaristanî de 17 qezayan de xebatanê xo dewam kenê.

2 tonî ra vêşêr xidayî îmha bî

Çarçewaya xebatan de 7 aşmanê peyênan de ekîban 6 hezar û 500 cayanê karan de kontrol kerd û kontrolan reyde 10 hezar kesî rê perwerdeyê serêkarî da. Kontrolan de 2 tonî ra vêşêr werê xeripîyayeyî û werê ke tarîxê ci vîyarto îmha bî û seba cayê karî ke bêqayde xebitîyenê 32 protokolê tesbîtî ameyî girewtiş.

308 cayê karî yê ke waştişê Beyraqa Sipî kerdî, kontrol bîy

Sewbîna 308 cayê karî ke seba ke Beyraqa Sipî bigîrê Şaredarîya Şaristanê Girdî rê muracat kerdo, hetê krîteranê dîyarkerdeyan ra ameyî kontrolkerdene.

Kontrolî û perwerdeyê karî do dewam bikerê

Serekê Daîreya Karê Weşîye Vahap Saçakliyî ke derheqê xebatan de malumat da, îfade kerd ke înan bi ekîbanê Koordînasyonê Kontrolê Werî demêko kilm de zaf cayê viraştişî û rotişê werî de kontrolî kerdî. Saçakliyî dîyar kerd ke hûmara kontrolan qezayan reyde resaya 6 hezar û 500î û qeyd kerd ke seba ke weşîya şarî bipawê, 2 tonî ra vêşêr werê ke tarîxê ci vîyarto, genî û xeripîyaye îmha kerdo. Saçaklî tekîd kerd ke heta peynîya serre do kontrolî û perwerdeyê karî dewam bikerê û do resayîşê şarî yê werê weşî asan bikerê.