Kaykere Nazan Kesal bi kayê xo yo yewkesî 'Birînê Mi Eşq ra yê' ke cuya şaîra Îranî ya bihêze Furug Ferruxzad îfade keno, Rojê Tîyatroyê Cinîyanê Amedî yê 1. de mêman bîye. Hemşaredara Şaredarîya Amedî ya Şaristanê Girdî Serra Bucak ke kay temaşe kerd, plakete daye Kesal.

Rojê Tîyatroyê Cinîyanê Amedî yê 1. ke hetê DBŞT’yî ra ameyo organîzekerdene, roja xo ya hîrêyine de kayê 'Birînê Mi Eşq ra yê' ke Şebnem Îşiguzelî nuşto, Berfîn Zenderlîoglu rejîsorî kerd û Nazan Kesal kay kerdo, ame kaykerdene. Kayê yewkesî yo ke Merkezê Kultur û Kongre yê Çand Amedî de virazîya, Hemşaredara Şaredarîya Amedî ya Şaristanê Girdî Serra Bucak, Hetkara Sekreterê Pêroyî Zerîn Turk, endamê meclîsî û zaf kesî temaşe kerd.

Kesal kay de nefesê Furug Ferruxzad ke demê şahê Îranî de ciwîyaya û şaîra îsyankar a ke bi şîîranê xo edebîyatê modernî yê Îranî rê bîya nimûne, ard sahne. Kay de trajedîyê cuya Ferruxzad; gedeyê xo ra dûrkewtene, surgunkerdene û vera keyeyî, komelî û tehdaya edebîyatkaranê camêrdan vindertişê aye ke bi hunerê xo kerdo, ameyî qalkerdene.

'Roşnaya şima tim bibêrqo'

Kaykere Nazan Kesal ke badê kayî bi deqayî ameye çepikkutene, ard vîr ke a 10 serrî Amed de ciwîyaya û va "Mi xo hîs kerd ke ez reyna bîya dayîk û ez zaf bextîyar a ke ez tîya de ya." Kesal wina dewam kerd: "Saya şima mi kayêko balkêş kay kerd, ma pîya kay kerd çunke kay bi temaşekeran pîya yeno kaykerdene. Mi no kay Narîn û heme kênekî ke hema dawaya înan dewam kena û zerarêko gird dîyo, înan rê kay kerd -ke pêroyînan zerar dîyo la tîya de hîkayêko bin est o-. Manaya çekuya Furug roşna ya. Cumleya peyên ê kayî wina ya 'Wa roşnaya şima tim bibêrqo.'"

HemÅŸaredare Bucak plakete daye Kesal

Hemşaredara Amedî ya Şaristanê Girdî Serra Bucak plakete daye Kesal, sipas kerd û va: "Ez nêwazena wexto ke hunermedî sahneyê tîyatroyî ser o yê, sîyasetkarî qisey bikê la ganî ma nê wayîfeyî zî bîyarê ca. Şima newe va ke şima 10 serrî Amed de mendê û no bajar cayêko xas o. Sey şima hunermedêka xase rê ganî dîyarîyêka xase bêro dayene."

'Kayêko ke Amed yeno

Berfîn Zenderlîoglu ke kayî rê rejîsorîye kerda, va ke înan mîsalê Furugî ser o hîkayeya cinîya ke bi hunerê xo mucadele kena û vera rejîmî vinderta, arda sahne û wina dewam kerd: "Her çiqas cayê ma cîya bo zî, tengasîyê ke Furugî dîyê, têkîlîyê ke a ciwîyayê û cinîbîyayîşê aye de zaf nuqteyê hemparî est ê, coka no kay Amed yeno."