Nuştoxa Tîyatroyî Sîmîn Çayçî ke beşdarê sohbetö ke çarçewaya Rojê Tîyatroyê Cinîyanê Amedî de virazîyabîy, qal kerd ke cinîyê Sîneyî senî bi ziwanê bedeni vera şîdetî vindenê û kêmîkerdişê îmkanan ê rejîmî bi hawayê tîyatroyî anê ziwan.

Rojê Tîyatroyê Cinîyanê Amedî yê 1. ke hetê Tîyatroyê Şaristanî yê Şaredarîya Amedî ya Şaristanê Girdî (DBŞT) ra yeno organîzekerdene, roja xo ya hîrêyine de xebatan reyde dewam keno. Na çarçewa de bi sernameyê "Muhîmîya şanoyî cuya cinîyan de û tesîrê ey ê positîfî yê fikr û komelî ser o" Merkezê Kultur û Kongre yê Çand Amedî de sohbetêk virazîya.

Qiseykerdişê Nuştoxa Tîyatroyî Sîmîn Çayçî ke Sîne ra ameybî, hetê Sereka Daîreya Kultur û Karanê Sosyalan Zeynep Yaş ra ame açarnayene.

Çayçî verî hîkayeya destpêkerdişê tîyatroyî yê cinîyanê Sîneyî qal kerd û va ke cinîyan 1967 ra heta ewro problemê xo ardê sahneyê tîyatroyî ser. Çayçî îfade kerd ke cinîyan; heqê cinîyan, vindertişê vera şîdetê cinîyan, kêmîkerdişê heqan yê rejîmê neweyî bi ziwanê bedenî û bi hawayê tîyatroyî ardî ziwan. Çayçî va "Cinîyan kayî nuştî û sahneyê tîyatroyî de ziwanê bedenî şuxulna û problemê komelkî ardî sahne ser. Bi nê cesaretî ke cinîyan mojna, camêrdî zî dest kerd ci ke sahneyê tîyatroyî hîna zaf bişuxulnê."

Çayçî qal kerd ke serranê 1990î de domanê ke nêeşkenê bivînê û bieşnawê, înan rê mamosteyî kerda û kayê xo yo verên seba înan nuşto û wina dewam kerde: "Kayê Xalxalok û Şaxê Mîşka ke mi hikayeyanê şarî ra arê da û nuşt, domanan û komelî ser o zaf tesîr kerd. No kay ke hemê qonaxanê xo de cinî est bî, 65 rey ame kaykerdene. No kay ke bi hawayêko muzîkal û şîîrkî ameyo nuştene, Festîvalê Saqizî de 9 xelatî girewtî."

Çayçî va, heta lîse înan na mucadele kerda, dima bi tesîrê komelî keyeyanê roşnvîran kênanê xo şawitê mekteb û dersanê bale, muzîk û tîyatroyî û bi no hewa yew qatê hunerî virazîya.

Kayê cinîyan o verên: Sevê

Çayçî qal kerd ke badê 1990î xususen seba ke bale bianco tecawuzê zewacê mîyanê keyeyî ser, aye kayê Sevê nuşto. Çayçî dîyar kerd ke tecawuzê zewacê mîyanê keyeyî komel de nêyeno qalkerdene la derdêko zaf gird o û va ke no kayê verên o ke aye seba hîşyarîya komelkî nuşta.

Çayçî ehemîyetê tîyatroyê kuçeyan zî ard ziwan û va ke xususen Merîwan de kayê ke rî bi rî yenê kaykerdene, tesîrêko gird kenê. Xususen mîyanê cinîyanê ke şîyê Ewropa de zî cinî şîdetê cinîyan û heqê cinîyan ser o nêvindertê û bi tîyatroyê kuçeyan nê çîyan anê ziwan û rasterast cînîyan reyde têkilî ronenê.

Yaş: Ma cinîyan pawenê ke bêrê tîyatro 

Yaş badê sohbetî plakete daye Çayçî û sipas kerd û va ke zaf meraqdar û bi dîqqet beşdarê tîyatroyî est ê. Yaş va ke Rojê Tîyatroyê Cinîyan heta roja yewşemeyî dewam kenê û ê pawenê ke heme cinîyê bajarî bêrê tîyatroyî.