Mudirîya Pêroyî ya DÎSKÎ ya Şaredarîya Amedî ya Şaristanê Girdî, qezayanê merkezî de 7 aşmanê peyênan de şebekanê kanalîzasyon û awa şimitişî de 5 hezar û 262 xirabîyî safî kerdî, 92 hezar û 325 metre xetê kanalîzasyon û awa varanî pak kerdî.

Mudirîya Pêroyî ya DÎSKÎ, merkezê bajarî de xirabîyanê awa şimitişî û kanalîzasyonî virazena û xebatanê xo dewam kena.

Ekîbê Serekîya Daîreya Kanalîzasyonî û Serekîya Daîreya Awa Şimitişî qezayanê Yenîşehîr, Baglar, Kayapinar û Sûrî de goreyê îxbaranê şarî 7 aşmanê peyênan de 5 hezar û 262 xirabîyanê kanalîzasyon û awa şimitişî safî kerdî.

Xirabîyanê awa şimitişî rê ca de mudaxele

Ekîbê tamîr û pakerdişî yê Serekîya Daîreya Awa Şimitişî, seba ke awa şimitişî ke hewcedarîya tewr muhîme de problem mevojîyo, xirabîyan rê ca de mudaxele kenê. Ekîban 7 aşmanê peyênan de merkezê bajarî de 2 hezar û 857 xirabîyê xetanê awa şimitişî safî kerdî.

2 hezar û 405 xirabîyê kanalîzasyonî ameyî safîkerdene

Serekîya Daîreya Kanalîzasyonî zî 7 aşmanê peyênan de 2 hezar û 405 xirabîyanê kanalîzasyonî safî kerdî. Ekîban, badê ke xirabîyanê binê erdî safî kerdî, asfaltê cadeyê xirabîyayeyî zî rona.

92 hezar û 325 metre xetê kanalîzasyon û awa varanî ameyî pakkerdene

Na çarçewa de ekîban, 7 aşman de 92 hezar û 325 metre xetê kanalîzasyon û awa varanî pak kerdî û temîn kerdî ke xetî aktîf bixebitîyê. Ekîban reyna 7 hezar û 21 çalî û 2 hezar û 33 xerbendî pakî kerdî.