Meclîsê Şaredarîya Amedî ya Şaristanê Girdî, Kombîyayîşê Adetî yê Teşrîna Peyêne şarî reyde kerd. Hemşaredaran Serra Bucak û Dogan Hatunî ke kombîyayîşî de qisey kerd, vera qeyyûman ke şaredarîyan rê ameyê tayînkerdene reaksîyon mojna û va 'Şaredarî yê ma yê, ma destûrê xespî nêdanê.’

Meclîsê Şaredarîya Amedî ya Şaristanê Girdî, roniştişê verên yê Kombîyayîşê Adetî yê Teşrîna Peyêne vera şaredarîye de şarî reyde kerd. Kombîyayîşî de ke binê serekîya Hemşaredaran Serra Bucak û Dogan Hatunî de vera şaredarîye virazîya, endamê meclîsî û şar beşdar bîy.

Kombîyayîşî de şarî rê xebatê şaredarîye sînevizyon de ameyî mojnayene. Hemşaredaran verê kombîyayîşî yew bi yew endamê meclîsî û şarê ke ameyî, silam kerdî.

'Ma şahidîya prosesê antî-demokratîkî yê demê OHALî kenê'

Hemşaredare Serra Bucak ke akerdişê kombîyayîşî de qisey kerd, bale ant qeyyûman ke ameyê tayînkerdene ser û va: '31ê Adare ra dima yew îrade vejîya meydan. Çi heyf ke qeyyûmê ke Wanî ra dest pêkerd, Hekkarî de dewam kerd û tewr peynî Esenyurt, Mêrdîn, Batman û Xelfetî de dewam kerd, ma reyna naye reyde rî bî yê.'

Bucak va ke ê sîstemê qeyyûmanê antî-demokratîk û bêmeşruyan protesto kenê û bale ant ser ke qeyyûmî 2016 ra nata sistemêk o ke hukmatî herêman de weçînayeyî nêhesibnayo û îradeyê şarî çin hesibna û no sîstem awan kerd.

Bucak ke dîyar kerd qeyyûm nameyê sistemê Rewşa Awarteyî (OHAL) yo, wina dewam kerd: 'Ma şahidîya prosesê antî-demokratîkî kenê ke 2016 de demê OHALî de dest pêkerd la nêzanê çira tena bajaranê ke şarê ma îradeyê xo mojneno, tede dewam keno. Ma nê sistemê bêmeşruyî nêşinasnenê. Ma nê xespî qebul nêkenê. Qeyyûman 8 serran de şaredarîyan de sistemêkê talanî û xerabîye viraşt û qadê rayberîyê herêmkî yo veng û tal awan kerd. Înan bajarê ma hem hetê komelkî hem zî hetê ekonomîkî ra tabloyanê zaf giran de verda. Ma na tablo qebul nêkenê. Ma wazenê ke hemşaredarê şaredarîyan ê weçînayeyî, endamê meclîsî û vatişê nê şarî est bibê, reyna wazenê ke xebatkarê şaredarîye bi heme beşanê xo vengê nê şarî û vatişê nê şarî bê. Şaredarî yê ma yê, ma destûrê xespî nêdanê.'

Badê qiseykerdişê Bucak kombîyayîş dest pêkerd. Kombîyayîşî de madeyê rojeve yew bi yew ameyî wendene û pêşkêşê vengdayîşî bîyî.

'Şarî nêva ke şima şaran bikê dişmenê yewbînan'

Hemşaredar Dogan Hatunî ke padayîşê Meclîsî de qisey kerd, dîyar kerd ke reya verêne şarî rê akerde kombîyayîş virazîyeno û rexne kerd ke endamê meclîsî yê partîyanê bînan, endamê DEM Partî ra teber beşdarê kombîyayîşî nêbîyî. Hatunî va ke hewcedarîya welatî bi pêkewtişî çin a bi pîyayîye est a û wina dewam kerd: ‘Çi heyf ke polîtîkayê ke şaran dişmenê yewbînan kenê û fikrê sîyasîyê cîyayan teşwîqê kîn û nefretî kenê, welat nînan vera yo. Nameyê naye tetbîqî qeyyûm o. Helbet berpirsîyarîyêka sîyasîye yê nê tetbîqî est a. Ma ney sey êrişkerdişê hukmî ke nêeşkeno nê welatî îdare bikero, vînenê. Eke teklîfê çareyî yê sîyasetê welatî bibîyêne, înan do nê teklîfî heme şaranê ke welatî de ciwîyenê, înan rê bidayêne û bi pîyayîye heme problemî safî bibîyêne. Hukmat ke çareyî nêmojneno, wexto ke nêeşka welatî îdare bikero, xo vurna polîtîkayanê ke şaran kenê dişmenê yewbînan. Eke şima nêeşkenê nê welatî îdare bikerê, şima şênê cesûrane vajê şarî ra. Şima şênê welatî berê weçînayîşî. Şima şênê xo apey biancê. Heqê şima çin o ke şima şarê nê welatî bikê dişmenê yewbînan. Şarî şima rê nêva ke şima şaran bikê dişmenê yewbînan. Eke teklîfê çareyî esto seba nê herbî yê Rojhelatê Mîyanênî, bîyarê meclîs. Eke teklîfê çareyî est o seba problemê kurdan, bîyarê meclîs. Temsîlkarê partîyanê sîyasîyan helbet do fikrê xo şima reyde par bikerê. Cayê heme hukmê ke şarî muhîm nêgênê tena kofikanê gindoran o. No welat kin û nefretan ra mird bîyo. Heme şarê Rojhelatê Mîyanênî rişnayîşê gonî ra mird bîyê. Ez seba partîyanê sîyasîyan pêrune ke bê 'ema' teklîfê çareyî tede est o, venga înan dana. Eke teklîfê şima yê çareyî esto meclîs cayê munaqeşeyê naye yo, cayê tewr muhîm o ke do çare virazo. Polîtîkayanê ke şarî kenê vera şima û qeyyûman ra dest bidê. Qeyyûm şima rê vindî keno, kesî rê zî qezenc nêkeno, fikirê sîyasîyê şarî nêvurneno. Eke fikirê sîyasîyê şarî bivurnitêne, di rey ame ceribiyayene û bi hende zêdeyan ageyra şima. Bewnê ke manaya naye çi ya. Bêrê ma pîya heme şaran reyde seba krîzê ekonomîkî, seba kesê ke wazenê bi ziwanê xo yê dayîke cuya xo dewam bikerê, çareyan bivînê.'

Badê waştiş û pêşnîyazan kombîyayîş qedîya.