Hemşaredaranê Şaredarîya Amedî ya Şaristanê Girdî Serra Bucak û Dogan Hatunî, Qezaya Kayapinarî de zîyaretê keye û esnafan kerd.

Hemşaredarê Şaredarîya Amedî ya Şaristanê Girdî Serra Bucak û Dogan Hatunî taxanê cîya-cîyayanê bajarî de zîyaretê keye û esnafan dewam kenê. Hemşaredare Bucak Taxa Firatî ya Qezaya Kayapinarî de zîyaretê keyeyan kerd.

Hemşaredare Bucak: Ma pîya vera qeyyûmî vejîyê

Hemşaredare Bucak ke şarî reyde sohbet kerd va "Ma sey Şaredarîya Şaristanê Girdî ameyî ke ma goşdarîya waştiş û pêşnîyazanê şima bikê." Bucak bale ant tetbîqê qeyyûmanê Hekkarî, Mêrdîn, Batman û Xelfetî ser o û va ke şar Batman de vera tayînkerdişê qeyyûmî vindeno. Bucak va "Ma pîya bêrê têhet û vera tetbîqê qeyyûmî vejîyê."

Şar: Ma hetê hemşaredaranê xo yê weçînayeyan de yê

Şarî ke zîyaretê keyeyan de ecêb mendî ke Hemşaredare Bucak ameya keyeyê înan va "Ameyîşê şima yê keyeyê ma zaf şa kerdî." Şarî persê "Waştişê şima yê şaredarîye est ê?" rê va "Ma nêwazenê qeyyûm bêro, çîyêko bîn ma nêwazenê." Şarî dîyar kerd ke ê vera tayînkerdişê qeyyûman ê û va ke ê do hetê hemşaredaranê şaredarîye yê weçînayeyan de bê.

Hemşaredar Hatun: Ganî ma wayîrê îradeyê xo vejîyê

Hemşaredar Dogan Hatunî ke Taxa Firatî û Bulwarê Nazim Hikmetî de kahweyî zîyaret kerd, şar û esnafan reyde sohbet kerd, goşdarîya waştiş û pêşnîyazanê înan kerd. Hemşaredar Hatunî ke pratîkê 8 serreyî yê qeyyûman îzeh kerd, bale ant problemanê awa şimitişî û kanalîzasyonî yê bajarî ser o ke 8 serran de kom bîyê. Hatunî va "Ganî ma pîya wayîrê îradeyê xo vejîyê."

Zîyaretan de Hemserekê DBP’yî ya Şaristanê Amedî Sultan Yaray û Mehmet Şîrîn Gurbuz Hemşaredaran reyde bîy.