Hemşaredarê Şaredarîya Amedî ya Şaristanê Girdî Dogan Hatunî, Taxanê Huzurevlerî û Medya yê Qezaya Kayapinarî de esnafî zîyaret kerdî û dîyar kerd ke ê do vera tayînkerdişê qeyyûman wayîrê îradeyê şarî vejîyê.

Hemşeredarê Şaredarîya Şaristanê Girdî Dogan Hatunî, Parlamenterê DEM Partî yê Amedî Cengîz Çandar, Hemşaredarê Şaredarîya Kayapinarî Cengîn Dundar, Hemserekê DBP’yî yê Wîlayetî Mehmet Şîrîn Gurbuz û endamanê meclîsî reyde Taxê Huzurevlerî û Medya de esnafî zîyaret kerdî. Hemşeredar Hatunî esnafî reyde sohbet kerd û goşdarîya waştiş û pêşnîyazanê înan kerd.

Hemşeredar Hatunî behsê xirabîya 8 serran kerd

Hemşeredar Hatunî ke zîyaretê esnafan de qisey kerd, dîyar kerd ke qeyyûman 8 serrî bajar îdare kerdo û behsê xirabîya ke 5 qeyyûmanê tayînkerdeyan viraşta kerd. Hemşeredare Hatunî qeyd kerd ke qeyyûman rayîr, awe û herre de her çî tesîr kerdo û wina va: "7 aşmî yo ma tîya de yê û ma hema nêeşkayî pakkerdişê kanalîzasyonî yê 8 serran temam bikê. Şima dî ke bajarê ma payîzî de varişî ra senî mendbi binê awe. Heme şar zerar dî. Demêk bî problemê heme şarî. Ma do bajarê xo de wayîrê îradeyê şarî vejîyê."

Hatunî îfade kerd ke vera qeyyûman do Batman de roja yewşeme mîtîng bêro viraştene û va "Ma venga heme şarê xo danê ke bêrê nê têgêrayîşî."

Çandar: Nê veravindertişî reyde no qerar do bêro apeygirewtene

Parlamenterê DEM Partî Çandarî zî behsê prosesê tayînkerdişê qeyyûman ê şaredarîyan kerd û îfade kerd ke demêk de ke ê bihêvî bîyê, qeyyûmî şaredarîyanê Esenyurt, Xelfetî, Mêrdîn û Batmanî rê ameyî tayînkerdene. Çandarî dîyar kerd ke şar vano "ma wazenê ke weçînayeyê ma ma îdare bikerê" û wina qisey kerd: "Wexto ke weçîneyeyê şima xizmetan reyde eleqedar bîyî, înan va 'ma îradeyê şima nêşinasnenê, ma do Anqara ra seba şima qeyyûm bîyarê.' La na rey sey 8 serranê verênan sereyî nêkewtî war, berz bî û xoverdayîş dest pê kerd. Nê veravindertişî reyde teqez qerarê qeyyûman do bêro apeygirewtene. Ma ke nê têkoşînî bidê, komelê sivîlî lingan ser bê, şar ke vajo 'no îradeyê ma yo, qeyyûmî rê ney’, no têkoşîn teqez do bireso serkewtişî. Nê Amed do qeyyûm bêro ne zî qeyyûmê Mêrdîn, Batman û Xelfetî cayê xo de do bimanê. Teqez no qerar do bêro apeygirewtene, îradeyê şima bi rika nê serran do bireso serkewtişî."