Hemşaredara Şaredarîya Amedî ya Şaristanê Girdî Serra Bucak, çarçewaya kampanya 'Vatişê Ma Nêqedîyayo, Ma do Pîya Şîdetî Vindarnê' de Cayê Parkê Kent 2î yê Qezaya Kayapinarî de cinîyan reyde 80 şitilî ronayî û dîyar kerd ke têkoşîno ke vera şîdetê cinîyan yeno dayene, do bireso serkewtişî.

Xebate de ke munasebetê 25ê Teşrîna Peyêne Roja Têkoşînê Vera Şîdetê Cinîyan organîze bîya, Hetkara Sekreterê Pêroyî Zerîn Turk, Sereka Daîreya Xizmetê Cinî û Keyeyî Ozden Gurbuz Sumer û mudirê bînî beşdar bîyî.

Bucak ke qisey kerd, va 'Ma na kampanya reyde wazenê ke şîdetê cinîyan, kiştişê cinîyan û polîtîkayê dişmenê cinîyan ê hukmatî bivindarnê. Semedê ney ganî ma têkoşînê xo gird bikê û ma do veng bidê pêroyê Tirkîya.'

Bucak dîyar kerd ke 357 cinîyî 10 aşmanê peyênan de ameyê kiştene û va 'No tena yew hûmare nîyo, her yew cuya ke ameya kiştene, keyeyê xo, gedeyanê xo û embazê xo zî tesîr kerdo.'

Daîreya Xizmetê Cinî û Keyeyî do çarçewaya 25ê Teşrîna Peyêne Roja Têkoşînê Mîyanneteweyî ya Vera Şîdetê Cinîyan de tayê xebatan organîze biko:

- Taxan de, otobusan de û kahwexaneyan de xebatê hîsdarîya vera şîdetê cinîyan (15-29ê Teşrîna Peyêne)

- AVMyan de têhetameyîşê cinîyan (21-27ê Teşrîna Peyêne)

- Şanoyê 'Çalakîya Mal Çêkirî' yo ke bi kurmancî yo (23ê Teşrîna Peyêne)

- Panel derheqê têkoşînê huqûqî û polîtîkî yê vera şîdetê cinîyan de (24ê Teşrîna Peyêne)

- Atolyeya Xopawitişê Nêzdî seba personelanê cinîyan (23ê Teşrîna Peyêne - 23ê Kanûne)