Hemşaredarê Şaredarîya Bajarê Girdî Serra Bucak û Dogan Hatun, beşdar programê Serekê ÎBB û TBB’yî Ekrem Îmamogluyî û endamanê encumenê TBB’yî bîye ke vera tayînkerdişê qeyyûman ameyî Mardîn.

Hemşaredarê Şaredarîya Bajarê Girdî Serra Bucak û Dogan Hatunî, seba ke piştî bidê Hemşaredarê Şaredarîya Mardînî ya Bajarê Girdî Devrîm Demîr û Ehmed Turkî ke cayê înan de qeyyûm ameyo tayînkerdiş, şîyî mêmanîya Serekê Şaredarîya Stenbolî ya Bajarê Girdî û Yewîya Şaredarîyanê Tirkîya (TBB) Ekrem Îmamoğluyî ke ameyo bajar, Teyaragehê Mardînî de pêşwazîye kerd. Hemşaredarî, Îmamoğlu û heyet, dima şîyî keyeyê Ehmed Turkî yê Qeza Dêrikî.

Turk: Bi sîyasetê qeyyûmî mumkin nîyo ke yew demokrasî bêro

Badê zîyaretê keyeyê Turkî beyanat ame dayene. Hemşaredarê Şaredarîya Mardînî ya Bajarê Girdî Ehmed Turkî, seba zîyaretê ey Serekê ÎBByî Ekrem Îmamoğluyî û serekê şaredarîyan ke pîya ameyî, sipas kerd. Turkî îfade kerd ke ê pîya pêroyê vurîyayîşanê Tirkîya taqîb kenê û va bi sîyasetê qeyyûmî nê welatî rê nêeşkeno demokrasî bêro. Turkî qeyd kerd ke ganî prosesêko aşitîyane aver şêro û îfade kerd ke êyê ke bawerîya xo demokrasî anê, seba naye xebitênê.

Îmamoğlu: Ma seba paştîdayîşî tîya yê

Serekê ÎBB û TBB’yî Ekrem Îmamogluyî zî va ke ê seba "derbasî bo" ameyê Hemşaredarê Şaredarîya Mardînî ya Bajarê Girdî het û qeyd kerd ke Tirkîya de ganî rayberîyê herêmkî û demokrasî bihêz bê. Îmamogluyî îfade kerd ke wexto ke zêdekerdişê aramîya herême qisey kenê, çi heyf ke bi serran eksê naye ciwîyenê û wina dewam kerd: "Ma ewro qeyyûmî, xesbkerdişê heqê weçînayîş û weçînîyayîşî qisey kenê. Şarê kulturê qedîm Mêrdîn de ma do cayêko yewbîyayîşêko bihêzêr de qisey bikerdêne, sey TBB’yî ewro tîya de ma qeyyûmî qisey kenê. No rewşêk o ke sereyê ma roneno war. No rewşêk o ke ma şermezar keno. No rewşêk o ke Cumhurîyetê Tirkîya rê hetê îtîbarî ra zerar dano. Ma her yew seba başîya nê welatî, seba yewbîyayîşê welatî tîya yê. Edalet, demokrasî zaf muhîm ê. Seba ke ma xo nê pêroyîne ra bixelisnê, seba tesîsê huqûq, yewbîyayîş, aştî û seypêyîya Tirkîya, ma ewro tîya de pîya paştî danê."

Zîyaretê esnafan

Badê beyanatî Hemşaredarî Bucak û Hatun û Serekê TBB’yî Îmamoglu, endamê encumenê TBB’yî û heyet, Mardîn de şîyî zîyaretê esnafan.

Qebulkerdiş û programê ke Mardîn de ameyî organîzekerdiş, tede endamê encumenê TBB’yî, Sekreterê Pêroyî yê TBB’yî Suat Yildiz, Hetkarê Hemserekê Pêroyî yê Berpirsîyarê Rayberîyanê Herêmkîyan ê Partîya DEMî Mehmet Ruştu Tîryakî, Hetkarê Serekê Pêroyî yê CHP’yî Gul Çîftçî Bînîcî û Gokçe Gokçen, Parlamenterê CHP’yî yê Rihayî Mahmut Tanal, Parlamenterê Hatayî Servet Mullaogluyî û serekê şaredarîyan û endamê meclîsî yê CHP’yî beşdar bîyî.