Şaredarîya Amedî ya Bajarê Girdî, seba ke resê pêroyî hîna rehet, erjan û konforın bibo, 14 otobusanê neweyan rê prosesê lazimî kerdî û dest bi teqsîtan kerd. Otobusê neweyî do aşma Adare de dekewê xizmetê şarî.

Şaredarîya Amedî ya Bajarê Girdî seba ke fîloyê xo yê wasitayan ke 330 hebî yo, hîna hîra biko xebatanê xo dewam kena. Meclîsê Şaredarîya Bajarê Girdî, seba ke resê şarî hîna rehet, hîna konforin û hîna lez bibo, seba 150 otobusanê neweyan de qerar girewt. La badê qerarî waştişê otobusanê neweyan, hetê Wezaretê Derûdor, Bajarwanî û Vurîyayîşê Îklîmî ra bi sebebê Tebîxê Tedbîranê Tasarufî ame sînorkerdene. Şaredarîya Bajarê Girdî zî tena destûr ame dayene ke vera 14 xurdayan otobusê neweyî eşkenê bêrê girewtene. Şaredarîya Bajarê Girdî ke seba 14 otobusan dest bi proses û dest bi teqsîtan kerdo, 14 otobusî do aşma Adare de dekewê xizmet.

Hetkarê Sekreterê Pêroyî yê Şaredarîya Amedî ya Bajarê Girdî Reşat Bakanî derheqê peydakerdişê otobusan û qerarê wezaretî de melumat da, dîyar kerd ke ê mecbur ê bi hawayêko konforin resê pêroyî pêşkêş bikê û va ganî hukmatê merkezî zî bi hawayêko ciddî piştî bido.

'Ma seba 7 otobusan teqsîto verên da'

Bakanî dîyar kerd ke ê sey Şaredarîya Bajarê Girdî seba ke resayîşê bajarî bireso yew merhelaya rehet û konforin gamê verênî eştî û wina dewam kerd: "Gamê verênî, teqrîben 100 otobusî ke ma wezaretî ra waştbî, çi heyf ke bi 14 heban ameyî sînorkerdene. Ma hema dest bi prosesanê peydakerdişê nê 14 otobusan kerd. Ma seba 7 otobusan teqsîto verên da. Ma do seba 7 otobusanê bînan 29ê aşmî de 2 teqsîtan bidê. Nê 14 otobusê ma ke ma siparîş kerdê tewr erey aşma Adare de do xizmetê şarê ma de bê."

'Eke destûr bêro dayene ma do 100 otobusan bîyarê dekerê xizmetê şarî'

Bakanî dîyar kerd ke eke destûrê 150 wasitayan bêro dayene ê do çaryekê verênî yê serra 2025î de tewr tay 100 wasitayî bîyarê dekerê xizmetê şarî û wina va: "Ma do sey Şaredarîya Bajarê Girdî seba ke resêko rehet û konforin nê şarî û nê bajarî reyde pîya bêrê têhet bi heme hêz û cehdê xo xizmetê şarê ma de bê. Wa tena hetê hukmatê merkezî ra ma rê îmkan bêro dayene, ma rê destûr bêro dayene. Çunke bajarê ma hetê resî ra problemêko zaf ciddî ciwîyeno, şarê ma problemêko zaf ciddî ciwîyeno. Ma bi nê wasitayanê kehenan ke emrê xo qedîyayo, pê xizmetdayîşî de problem amcenê. Waştişê ma yo hukmatê merkezî ra o yo ke destûrê 150 wasitayan ke ma waşto, bêro dayene. Eke destûrê 150 wasitayan bêro dayene ma do çaryekê verênî yê serra 2025î de tewr tay 100 wasitayî nê bajarî, nê şarî rê bîyarê dekerêy xizmet. Ma naye îddîa kenê. Bitaybetî waştişêko ciddî yê Hemşaredaranê ma est o, ma paweyê gamêştişê hukmatê merkezî yê."

'Ganî ma hûmara otobusan bikê 450'

Bakanî qeyd kerd ke Meclîsê Şaredarîye qerarê peydakerdişê 150 wasitayan girewto û wina dewam kerd: "Ma eşnawenê ke do destûrê 82 otobusan ma rê bêro dayene. Ma meclîsê xo de qerarê peydakerdişê 150 otobusan girewto. Çunke nê bajarî de nika destê ma de 330 wasitayî est ê û teqrîben 100 hebî emrê xo temam kerdo. Ganî ma nê bajarî de hema hema 450 otobusan biresnê şarî. Seba ke no şar bireso resêko konforin, no bajarbi eheme qezayanê xo biresê, ma rê 450 otobusî lazim ê. Ney ra fek nêverdayêno. Coka nika hewcedarîya ma ya mewcude nêna temînkerdene."

'Ganî waştişê ma bêrê qebulkerdene'

Bakanî va ke ê mecbur ê seba her cayê bajarî resî bîyarê ca û wina dewam kerd: "Nika Amed de cayêk bi nameyê Oglakli ame akerdene. Seba awanîya ke erdlerzî ra dima ameya viraştene teqrîben 150 hezar nifûs do 25-30 kîlometreyî dûrî şêro. Coka ma mecbur ê resayîşê uca bîyarê ca. No sey Şaredarîya Bajarê Girdî yew wezîfeyê ma yo tewr pîl o. Reyna peynîya unîversîte de Teknokent de yew awanîya bajarî yena viraştene. Uca de teqrîben 100 hezar nifûs ciwîyeno. Coka ma mecbur ê nê cayan de resayîşêko konforin pêşkêş bikê. Ma seba ke nê resayîşê konforinî temîn bikê ganî hukmatê merkezî bi hawayêko ciddî ma rê piştî bido. Ganî waştişê ma bêrê qebulkerdene. Ma soz danê şarê xo, eke na sewîya de piştî bêro dayene ma do nê şarî biresnê resayîşêko tewr konforin. Ma do dewam bikê ke dewe ra mezra, mezra ra qeza her tewir xizmetî pêşkêş bikê. Wa tena waştişê ma hetê Wezaretê Derûdor, Bajarwanî û Vurîyayîşê Îklîmî ra bêro tesdîqkerdene. Ma do heme şertanê butçeyê xo biwazê. Ma do bîyarê dekerê xizmetê resî. La ez bi reyna vana, ganî Wezaretê Derûdor, Bajarwanî û Vurîyayîşê Îklîmî waştişê ma qebul biko, ganî waştişê nê şarî qebul biko. Ma naye wazenê, ma çîyêko cîya nêwazenê. La ma hazir ê ke butçeyê xo zî bîyarê dekerê xizmetê şarî, ma do xebatanê xo dewam bikê."

'Seba wasitayanê xurdayan destûr ame dayene'

Bakanî îfade kerd ke nika seba ke 14 wasitayî bîyê xurda destûr ameyo dayene û va: "Reya verêne ma rê 14 heban rê destûr ame dayene eke hîna zêde destûr bêro dayene ma do hîna zêde xizmetê resayîşî bajarî rê pêşkêş bikê. La nika seba ke 14 otobusî bîyê xurda destûr ameyo dayene. Yanî nika ma her aşme 300 ra heta 500 hezar her wasita rê mesref kenê. Zerarê raya pêroyî yeno meydan. Seba ke ma vernîya nê zerarê raye bigîrê ganî waştişê destûrê ma bi lez bêro qebulkerdene. Coka ganî nê wasitayî trafîkî ra bêrê menkerdiş. Çunke wasitayê 12-13 serre yê."