Hemşaredara Şaredarîya Amedî ya Bajarê Girdî Serra Bucak, Şaredarîya Farqînî zîyaret kerd û guzergehê resê pêroyî o newe ke 14 taxanê dewan gêna xo mîyan û 50 kîlometre yo, etud kerd.

Hemşaredara Şaredarîya Bajarê Girdî Serra Bucak, Qeza Farqînî de cigêrayîş kerd. Hemşaredare Bucak ke Şaredarîya Farqînî zîyaret kerd, hetê Hemşaredara Şaredarîya Farqînî Sevîm Bîçîcî ra ameye qebulkerdene.

Badê qebulkerdişî Hemşaredare Bucak, awanîya xizmetî ya şaredarîye de Hemşaredara Şaredarîya Farqînî Bîçîcî û Hetkarê Sekreterê Pêroyî yê Şaredarîya Bajarê Girdî Reşat Bakan, Serekê Daîreya Resî Cengîz Temel, endamê meclîsî û muxtaran reyde ameye têhet. Pêvînayîşî de derheqê xizmetê resê pêroyî de ke do tayê taxê dewe û mezrayan rê bêro dayene, fikrî ameyî parekerdene.

Projeyê Parka Cuya Cinîyan ame pêşkêşkerdene

Dima projeyê Parka Cuya Cinîyan û Cayê Goristanî yê Qezaya Farqînî yê Gazatope ke 37 hezar metrekare yo, ameyî pêşkêşkerdene. Hemşaredare Bucak waşt ke xebatê Parka Cuya Cinîyan ke dest pêkerdo, wa bi lez bêro qedênayene. Bucak dîyar kerd ke badê weçînayîşanê herêmkîyanê 2024î ê vera deynê ke qeyyûmî viraşto, mendê û bale ant îhaleyê rayîran ser o ke qeyyûman seba propagandaya weçînayîşî kerda. Bucak ke nîşan da ke bi deynê ke qeyyûman verdayo, reyna zî çarçewaya yew plankerdişî de ê do rayîrê grûbê taxan û rayîrê pêgirewtişî virazê.

Hemşaredare Bucak, sîteya senayî de etud kerd

Hemşaredare Bucak, badê zîyaretê şaredarîye şîye Sîteya Senayî ya Farqînî. Hemşaredare Bucak erdê 12 donimî de ke ser o kargehî û awanîya îdareyî virazîyayê, etud kerd û berpirsîyaranê sîte ra derheqê mesela de melumat girewt. Berpirsîyarê sîteya senayî, seba ke proje bêro tetbîqkerdene Hemşaredare Bucak ra waştişê piştîdayîşî kerd.

Guzergehê resê pêroyî yo newe ke 14 taxan gêna xo mîyan

Hemşaredare Bucak, badê merkezê qeza şîye taxanê dewan ke guzergehê resê pêroyî yê neweyî etud biko. Hemşaredare Bucak ke otobusê Şaredarîya Bajarê Girdî kewt rayîr, guzergehê resê pêroyî yo newe ke 14 taxê dewan gêna xo mîyan û yeno plankerdene ke rojanê verê ma de xizmetê resê pêroyî bêro dayene, rayîrê grûbê taxanê Şifqet û Cumat ke 50 kîlometre yo, utud kerd. Hemşaredare Bucak, derheqê taxê dewan de ke do senî resê pêroyî ra îstîfade bikê, beşanê eleqedaran ra melumat girewt.

Hemşaredare Bucak, dima Taxa Daxcileran de şarî reyde ameye têhet û waştişê înan goşdarî kerdî. Bucak ke seba piştîdayîşê ke aye rê dayo, şarî rê sipas kerd û va "Piştîdayîşo ke şima danê ma keno bihêz."