Hemşaredara Şaredarîya Amedî ya Bajarê Girdî Serra Bucak, beşdar panela "Têkoşînê Huqûqî û Polîtîkî yê Vera Şîdetî" bî û dîyar kerd ke ganî sloganê "Jin Jiyan Azadî" hîna zêde bêro wayîrvejîyayene.

Serekîya Daîreya Xizmetê Cinî û Keyeyî, çarçewaya kampanyaya "Vatişê Ma Nêqedîya, Ma Do Pîya Şîdetî Vindarnê" de ke Şaredarîya Bajarê Girdî û şaredarîyê qezayan bi munasebetê 25ê Teşrîna Peyêne Roja Têkoşînê Mîyanneteweyî yê Vera Şîdetê Cinîyan ke dest pêkerdo, Merkezê Kultur û Kongre yê ÇandAmedî de panela "Têkoşînê Huqûqî û Polîtîkî yê Vera Şîdetê Cinîyan" organîze kerd. Panele de ke Hemşaredara Şaredarîya Amedî ya Bajarê Girdî Serra Bucak û zaf cinî beşdar bîyî, cinîyan rozetê ke şîarê kampanya ser o bî, pa kerdî.

Hemşaredare Bucak: Têkoşînê ma nêqedîya

Panele de qiseykerdişê akerdişî Hemşaredare Serra Bucak kerd. Bucak qiseykerdişê xo bi sipaskerdişê komel û sazgehanê cinîyan dest pê kerd û tekîd kerd ke ne cinîyan ne zî kurdan rê tena yew rojeve çin a, ê zaf rojevan ke têkilîya yewbînan reyde est a, dima şinê. Bucak va: "No proses, weçînayîşanê herêmkîyan ra heta ewro zêde beno û dewam keno la têkoşînê ma zî nêqedîya. Ez vera şima de vera cinîyanê ke Wayanê Mîrabelî ra ke vera rejîmê faşîst û dîktatorî têkoşînê xo kerdêne hetanî Rosayan têkoşîn kerdo, bi hurmete ana xo vîrî."

'Ma nê qedexeyî nêşinasnenê'

Hemşaredare Bucak bale ant ser o ke polîtîkayê şîdetî yê dewleta camêrdan, hetanî ewro ke dewletê neteweyî awan bîyê û aver şîyê û qeyd kerd ke nê polîtîkayî heme qatanê komelî ser o yenê tetbîqkerdene. Bucak îfade kerd ke tewr zaf cinîyî na rewşe ra tesîr gênê û wina dewam kerd: "La tewr zaf cinîyî vengê xo berz kenê. Seba ke tersayî, Walîtîya Amedî vizêr sloganê 'Jin Jiyan Azadî' ke felsefeya ma ya ciwîyayîşî, sebebê têkoşîn û estbîyayîşê ma yo, qedexe kerd. Yanî ma nê qedexeyî nêşinasnenê. No slogan ke herêm ra dest pê kerd û bî unîversal, resayo cinîyanê heme dinya û înan pê têkoşînê xo organize kerd. Seba naye ganî hîna zêde no slogan bêro wayîrvejîyayene."

'Metodê têkoşînê vera şîdetê dîjîtalî'

Badê qiseykerdişê akerdişî, moderatorîya Sereka Daîreya Cinî û Keyeyî Ozden Gurbuz de roniştişê verênî yê panele de Psîkologa Pispore Leyla Soydînç "Psîkolojîyê Şîdetê Camêrdan ê Cinîyan ser o", Rojnamegere Hebîbe Eren "Metodê Têkoşînê Vera Şîdetê Dîjîtalî yê Cinsîyetperestî"; roniştişê dîyinî de zî Dr. Oya Aydin "Ma Senî Eşkenê Peymana Stenbolî Têkoşînê Heqanê Cinîyan de Bikê Karger"; Parêzere Ruşen Seydaoglu zî "Polîtîkayê ke Vera Têkoşînê Cinîyan Yenê Tetbîqkerdene" ser o pêşkêşî kerdî.

Peyê panele de beşê pers û cewaban de persê beşdaran ameyî cewabdayene.