Kaykeroxanê cinî yê Tîyatroyê Bajarî yê Şaredarîya Amedî ya Bajarê Girdî kayê bi nameyê "Çalakîya Mal Çêkirî" ke adapteyê kurdkî kerdo, seba cinîyan kay kerd.

Serekîya Daîreya Xizmetê Cinî û Keyeyî, bi munasebetê 25ê Teşrîna Peyêne Roja Têkoşînê Mîyanneteweyî yê Vera Şîdetê Cinîyan fealîyetanê xo dewam kena.

Çarçewaya fealîyetan de kayê bi nameyê "Çalakîya Mal Çêkirî" ke hetê DBŞT’yî ra bîyo adapteyê kurdkî û ameyo sahne, bi hawayêko xususî seba cinîyan ame kaykerdene.

Resayîşê cinîyanê ke Sur, Kayapinar û Baxlarî ra waştêne bêrê kay ke Merkezê Kultur û Kongre yê ÇandAmedî de ame kaykerdene, servîsanê Şaredarîya Bajarê Girdî reyde ame temînkerdene. Teqrîben 120 cinîyan kay temaşe kerd.

Kayî ra hes kerd

Cinîyan kay de ke hîrê cinî keyeyî de hepis bîyê û bin tehda de ciwîyenê, vera "hepîsxaneyê tîpê keyeyî nê" vejênê û qîrrayîşê zereyê xo dekenê hereket, ca bi ca çepikan reyde temaşe kerd û zaf ecibna. Cinîyan ke va ma reya verêne yenê tîyatro û ma zaf şa yê, waşt ke nê tewir fealîyetî hîna zêde bibê.

Sipasîya kaykeroxan

Kaykeroxî ke badê kayî sahneyî ser o temaşekeran rê selam da, pay ra ameyî çepikkukene. Sereka Daîreya Xizmetê Cinî û Keyeyî Ozden Gurbuz Sumer, kaykeroxan rê sipas kerd û vilî pêşkêş kerdî. Gurbuz Sumer kampanyaya "Vatişê ma nêqedîya, ma do pîya şîdetî vindarnê" ke Şaredarîya Amedî ya Bajarê Girdî û şaredarîyê qezayan pîya dest pêkerdo, ci ser o tekîd kerd û va "Ma bi na kampanya xebate, têkoşîn û paştîdayîşê ke do yew serre dewam biko, dest pêkerd. Ma seba ke nê kayî reyde tîya de ameyî têhet û ma tena nêverdayî, cayêko taybetî ra sipasê kaykeroxan, rejîsorî û ekîbê teknîkî kenê."

Seba gedeyan fealîyeto cîya virazîya

Perwerdekerdoxê gedeyan ke girêdayeyê Serekîya Daîreya Xizmetê Cinî û Keyeyî yê, seba ke cinîyê ke mecbur mendê gedeyê xo xo reyde bîyarê, bieşkê kayê tîyatroyî temaşe bikê, fealîyetêko cîya organîze kerd. Gedeyanê ke salona sînema de fîlm temaşe kerd, dima bi kayanê cîya-cîyayan keyf kerd.

Pazarê taxan de broşurî vila bîyî

Şaredarîya Bajarê Girdî û şaredarîyê qezayan bi munasebetê 25ê Teşrîna Peyêne Roja Têkoşînê Mîyanneteweyî yê Vera Şîdetê Cinîyan kampanyaya "Vatişê ma nêqedîya, ma do pîya şîdetî vindarnê" çarçewa de pazaranê taxan û otobusan de broşurî vila kerdî.

Otobus û pazarê taxe yê Qeza Surî de vilakerdişê broşuran de ke Şaredarîya Surî reyde pîya ame kerdene, endamê meclîsê şaredarîye zî beşdar bîyî. Xebate de tekîd bi ke şîdeto ke cinîyan ser o yo îhlalê heqanê merdimîye yo. Xebate de ke îşaret bî ke her roje 5 cinî yenê qetilkerdiş, mesaj ame dayene ke mumkin o ke şîdet bêro vindarnayene û ganî pîya vera şîdetî têkoşîn bêro dayene û vengê xo nêro birnayene.