Hemşaredarê Şaredarîya Amedî ya Bajarê Girdî Serra Bucak û Dogan Hatunî, akerdişê Merkezê Perwerde û Destekê Ciwanan ke hetê Şaredarîya Hêni ra ame viraştene, kerd.

Hemşaredarê Şaredarîya Amedî ya Bajarê Girdî Serra Bucak û Dogan Hatun beşdarê akerdişê Merkezê Perwerde û Destekê Ciwanan bîy ke Şaredarîya Hêni viraşto. Hemşaredarî, hetê Hemşaredarê Şaredarîya Hêni Besîle Narîn û Hemdullah Demirî ra awanîya şaredarîye de ameyî qebulkerdene. Hemşaredarî, badê qebulkerdişî şîyî awanîya xizmetî ya şaredarîye û derheqê xebatan de yewbînan girewtî.

Hemşaredarî û heyet, seba ke akerdişê merkezî bikê ke binê Şaredarîya Hêni de do fealîyet biko, bi rayîrşîyayîş şîyî cayê akerdişî.

Hemşaredara Şaredarîya Hêni Besîle Narîn ke qiseykerdişê akerdişî kerd, dîyar kerd ke ê reyna zî bi heme bêîmkanan demêko kilmek de merkez akerd.

Hemşaredare Bucak: Xebatê ma bê ke lez kêm bibo, dewam kenê

Hemşaredare Bucak ke akerdişî de qisey kerd, va ke rojê verê ma de Merkezê Destekê Perwerdeyî de îmkanê sporî zî do bêrê tetbîqkerdene. Bucak ke waşt wa no ca seba ciwanan û cinîyan bi xeyr bo, qeyd kerd ke ê 8 aşmî yo rayberîyanê herêmkîyan de bê ke lezîye kêmî bibo xebatanê xo dewam kenê.

Bucak ke 25ê Teşrîna Peyêne Roja Têkoşînê Mîyanneteweyî yê Vera Şîdetê Cinîyan ser o qisey kerd û wina dewam kerd: "25ê Teşrîna Peyêne, roja têkoşîna vera şîdetê cinîyan a ke hetanî ewro Wayanê Mîrabelî ra ke Cumhurîyetê Domînîkî de rejîmê dîktatorî qetil kerdî, ameya. Ma bi xurtkerdişê têkoşînî û averberdişê daşinasnayîşî na roje qebul kenê. Ma hêvî kenê ke no merkezê ciwanan ke ma ewro akenê, do bibo zemîn, ca û îmkanêk ke eşkeno vera neseypêyîya perwerdeyî û neseypêyîya cinsîyetê komelkî de têkoşîn biko. Ma sey merkezê daşinasnayîşî vînenê ke tede şîdetê dewleta camêrdan ke çimeyê neseypêyîya komelî yo do bêro qiseykerdiş û cinî û camêrdî do nê perwerdeyan ra îstîfade bikê. Ma Şaredarîya Hêni pîroz kenê ke demêko wina kilmek de no merkez akerd."

Merkez abî

Badê qiseykerdişan Hemşaredare Serra Bucak û heyet qurdele birna û Merkezê Perwerde û Destekê Ciwanan akerd. Hemşaredarî û heyet dima merkezê ciwanan gêra û wendekaran reyde sohbet kerd.

Akerdişî de Hemşaredara Şaredarîya Yenîşehîrî Safîye Akdag, Hetkarê Sekreterê Pêroyî yê Şaredarîya Bajarê Girdî Reşat Bakan, Hemvatoxê Meclîsî Ebduselam Înceoren û endamê meclîsî hetê Hemşaredaran de bîyî.