Hemşaredarê Şaredarîya Amedî ya Şaristanê Girdî Serra Bucak û Dogan Hatunî, beşdarê rayîrşîyayîşî bîyî ke seba 25ê Teşrîne ame viraştene.

Seba Roja Mîyanneteweyî ya Têkoşînî ya Şîdetê Vera Cinîyan ya 25ê Teşrîna Peyêne, hetê Şebeka Têkoşînî ya Vera Şîdetî ya Amedî û Platforma Cinîyanê Amed Dicle (DAKAP) ra rayîrşîyayîşêk ame viraştene. Komêka girse ke mîyanê înan de Hemşaredarê Şaredarîya Şaristanê Girdî Serra Bucak û Dogan Hatun, parlamenterê Partîya Wekhevî û Demokrasîya Şaran (Partîya DEM), hemşaredarê qezayan, temsîlkarê rêxistinanê komelê sivîlî est bî, Meydanê berê Koyî de ameyî têhet û heta Birca Keçan şîyî. Vera Birca Keçan de beyanatî de ke ame dayene, veng ame dayene ke vera şîdetê ke cinîyan ser o yeno kerdene, têkoşîn bêro dayene.