Şaredarîya Amedî ya Şaristanê Girdî, seba ke raywani bieşkê demê resayîşê otobuse kontrol bikerê, dest pêkerd ke dingan de ekranan ronê.

Serekîya Daîreya Resî, goreyê waştişanê raywanan projeyan virazena. Na çarçewa de, Mudirîya Xebitnayîşê Otobuse 10 cayanê cîya-cîyayanê bajarî de "Ekranê Agahdarîkerdişê Raywanan" ronayî.

Do bieşkê deqîqa bi deqîqa otobuse teqîb bikerê

Bi Sîstemê Agahdarîya Dingê Zîrekî, kesê ke bi cîhazanê zîrekan teqîb kenê, do bieşkê ekrananê xususîyan ke dingan de yê, tira bivînê ke otobusa ke yena do çend deqîqayan de biresa dingî.

Vera-vera 10 cayan de ke zaf yenê şuxulnayene, ekranê xususî ronîyayî û reyna QR kodî zî ronîyayî. Raywanî bi cîhazanê xo yê mobîlan eşkenê QR kodan biwanê û bizanê ke otobusa înan key yena.

Dingê Zîrekî

Dingê ke tede Ekranê Agahdarîkerdişê Raywanan ronîyayê nê yê: "Unîversîteya Dîcle, Berê Koyî Gaffar Okan, Esma Ocak, Tesîsler, Ceylanlar, Forum, Nînova, Cadeyê Aram Tîgranî, Nêweşxaneyê Cigêrayîşî, Dîclekent."

Şaredarîya Şaristanê Girdî do dewam bikero ke dingê raywanan yê cayanê qelebalixan yê bajarî bedilno û bikero dingê zîrekî.