Şaredarîya Amedî ya Şaristanê Girdî, seba ke şar zimistanî bêproblem bivîyarno, hazirîyê xo yê ke dest pêkerdbî, temam kerdî.

Serekîya Daîreya Viraştişê Rayîran, Pawitiş û Koordînasyonê Binawanî, seba ke rayîranê merkezê bajarî û dewan de aşmanê zimistanî de problem nêvejîyo, hazirîyê xo temam kerdî. Serekîya Daîreya Viraştişê Rayîran, Pawitiş û Koordînasyonê Binawanî, do 17 qezayan de bi 100 karkeran û 62 makîneyanê karî vera vewre û cemed têkoşîn bikero. Na daîre, seba rewşanê lezabezan ke beno ke merkezê bajarî û qezayanê dewan de bibê, 1200 ton sole û agregaya sole, 16 greyderî, 9 kepçeyî, 10 erebeyê vewrepakkerdiş û soledayîşî, 6 loderî, 20 pîkapî û 10 kendox-barkerdoxî zî filoya xo de amade tepêşena.

Şaredarîya Şaristanê Girdî, seba her rewşêka neyînî ya ke beno ke bibo, do xebatanê xo şaredarîyanê qezayan reyde bi hawayêko koordînekerde bikero.

Seba ke xizmetê têkoşînî yê vera vewre nêvinderê, şar eşkeno rewşanê neyînan ke beno ke bibê, Alo 153î rê xeber bido.

Ekîbî, 7/24 hazir ê

Serekê Daîreya Viraştişê Rayîran, Pawitiş û Koordînasyonê Binawanî Ozgur Tekînî va ke ê 7/24 şew û roj bi esasê xebata vardîyayî seba têkoşînê vera vewre û cemedî amade yê. Tekînî wina va: "Seba ke şarê ma şertanê hewayî yê neyînan û vewre ra tesîr nêgîro, ekîbê ma 7/24 amade yê. Şarê ma eşkeno her tewir rewşêka neyînî de ALO 153î reyde têkilî ronê. Seba cemedî zî 10 erebeyê ma yê vewrepakkerdişî amade yê. Ma do cayê ke lazim vînenê, tede bi erebeyanê xo yê soledayîşî caddeyan û bulwaran de xebatan bikerê."