Hemşaredaranê Amedî Serra Bucak û Doğan Hatunî beşdarê akerdişê Aşxaneyê Şarî bîyî ke Şaredarîya Kayapinarî awan kerdo.

Şaredarîya Kayapinarî seba ke şarê bajarî rê werdêko erjan, pak, weş û emîn bido, Taxa Huzurevlerî de Aşxaneyê Şarî akerd.

Akerdişê aşxaneyî de Hemşaredaranê Amedî Serra Bucak û Doğan Hatunî, Hemşaredaranê DEM Partî yê Amedî Gulşen Ozer û Abbas Şahîn, Hemşaredara Kayapinarî Berivan Gulşen Sîncar, endamanê meclîsê şaredarîye û şar hazir bîy.

Şarê taxe û zaf kesê bînî ke akerdişî pawênê, vengê muzîkî reyde kewtî govendan.

'Ma do projeyanê hîna xurtan bîkerê'

Hemşaredara Kayapinarî Berivan Gulşen Sincari destpêkê verakerdişî de qisey kerd û va ke ê şarî reyde yê û çi kêmasîyî estê, vanê û gam bi gam xebatanê xo kenê. Sincari wina dewam kerd: "Ma bi gurûrêko pîl hîrêyine Aşxaneyê Şarî yê bajarî akenê. Ma dorûverê Nêweşxaneyê Cigêrayîşî de zî xebatêk wina kenê. Ma do bi ekîbêko pispor û projeyê hîna xurtan reyde tim şima het de bê."

Hemşaredar Hatun: Ma bêçare nîyê

Hemşaredar Doğan Hatunî ard ziwan ke ê çi qrarî daê tek bi tek anê ca û va: "Ma waşt ke ewro Şaredarê ma Cengiz Dundar zî ma het de bibo. Wazenê vengê ma û wayîrîya ma bibirnê la eke ma tek zî bimanê ma do dewam bikê ke xizmet bikê. Belkî şarê ma tengane de bo la çareyê ma est o. Ma do qeraranê xo pêrune bîyarê ca. Eke ma vato ma Aşxaneyê Şarî akenê, ma kerd. Wa xêr û weşî bo şarê ma rê, ma do pîya her çî rast bikê."

Servîso verên Hemşaredaran kerd

Hemşaredaran pîya qordele birna û aşxane akerd. Servîso verên hemşaredaran kerd û şarî eleqeyêko pîl nîşan da.

Roje hezar kesî do çar tewir werdan ra îstîfade bikerê

Aşxane do yewşemeyî ra teber her roje saete diwêsî ra hetanî pancêsî xizmet bido û çar tewir werdî 70 TL yê. Aşxane bitaybetî seba wendekar û şarê ke destteng o ameyo viraştene û do roje hezar kesan rê werd virazê.