Hemşaredara Şaredarîya Amedî ya Şaristanê Girdî Serra Bucak, beşdarê rayîrşîyayîşê vîrardişî bîye ke seba Tahîr Elçî ameybî viraştene ke Serekê Baroya Amedî yo verên bî.

Hemşaredara Şaredarîya Şaristanê Girdî Serra Bucak, beşdarê rayîrşîyayîşê vîrardişî bîye ke seba Tahîr Elçî yo ke Serekê Baroya Amedî bî û 28ê Teşrîna Peyêne ya 2015î de vera Minareya Çarlinge yê qezaya Sûrî de bi êrîşêko çekin cuya xo vîndî kerdbi, ameybî viraştene.

Rayîrşîyaîşê vîrardişî, bi beşdarîya Hemşaredare Serra Bucak, parlamenter, hemşaredaranê şaredarîyan, keyeyê Tahîr Elçî, embazanê ey yê karî û temsîlkaranê rêxistinanê komelê sivîlî, bi rayîrşîyayîşê Dadgehê Amedî ra dest pêkerd heta Minareya Çarlinge.

Vera Minareya Çarlinge de vîrardişî de, Serekê Baroya Amedî Ebdulkadîr Guleç, Serekê Yewîya Baroyî ya Tirkîya (TBB) Erînç Sagkan û xanima Tahîr Elçî Turkan Elçî qisey kerd.

Nameyê kuçeyî bî Tahîr Elçî

Serekê Baroya Amedî Guleçî va ke Şaredarîya Amedî ya Şaristanê Girdî û Şaredarîya Sûrî nameyê "Kuçeyê Tahîr Elçî" da nê kuçeyî û akerdişê kuçe zî do meşte bibo. Guleçî seba ke nameyê kuçe ame vurîyayene, Şaredarîya Şaristanê Girdî û Şaredarîya Sûrî rê sipas kerd.

Badê qiseykerdişan Hemşaredare Bucak û kesê ke aye reyde bîyî, binê Minareya Çarlinge de qerenfîlî ronayî.