Hemşaredara Şaredarîya Amedî ya Şaristanê Girdî Serra Bucak, çarçewaya kampanya "Sozê Ma Nêqedîyaya, Ma do Pîya Şîdetî Vindarnê" de esnafî zîyaret kerdî û va ke ê do bi destdayîşê yewbînan û viraştişê fehmî yê mîyanê komelî şîdetî vindarnê.

Bucak va ke ê wazenê şîdetê cinîyan û qirkerdiş biqedîyê. Aye va ke ganî heme kes, her şaristan û her rayberîya herêmî sîyasetanê têkoşînê vera şîdetî xo ra dest pê biko. Bucak îfade kerd ke 10 aşman de 300 ra vêşêr cinî ameyê kiştene û na rewşe zaf xirabin a.

Bucak dîyar kerde ke kampanya serrêk do dewam bikero û nê demî de do derheqê şîdetî de qisey bikê û kombîyayîşan virazê. Aye va ke cinî nêmeyê komelî yê û komelî anê meydan. Bucak va ke ê wazenê bibê vengê cinîyan ke nêwazenê bêrê kiştene.

Peynî de Bucak va ke ê wazenê nê têkoşînî de tena nêmanê û ê wazenê heme şarê Amedî na kampanya de ca bigîrê. Aye va ke ê eşkenê pîya dinya û bajarêko bêşîdet awan bikê û ganî camêrdî zî na mesela de hesas bibê.