Hemşaredarê Şaredarîya Amedî ya Şaristanê Girdî Dogan Hatunî, beşdarê akerdişê magazaya store ya Amedspor bî û va ke ê do serrêk de seba heme şûbeyanê sporî binawanîyêka girde virazê.

Magazaya store ya hîrêyine ya Amedspor Taxa Mezopotamya ya qezaya Kayapinarî de ame akerdene. Akerdişê magaza de Hemşaredarê Şaredarîya Şaristanê Girdî Dogan Hatun, Serekê Kulubê Amedspor Burç Baysal, Serekê Odaya Bazirganî û Pîşesazî ya Amedî (DTSO) Mehmet Kaya û zaf kesî beşdar bîyî.

Serekê Kulubê Amedspor Burç Baysalî akerdişî de qisey kerd û va ke ê do xebatanê binawanîye dewam bikerê û va "Ma do her ca de beyraqa Amedsporî biweşanê."

'Ganî stadyumî bêrê viraştene'

Hemşaredar Dogan Hatunî zî bale ant muhîmîya binawanîya sporî ser û wina va: "Amedspor rojeva ma ra nêvejîyeno. Amedspor vejîya Lîga 1. Na lîge sey Lîga 2. nîya. Rayîr û metodê na lîge cîya yê. Lazim o ke rayîr û metodî biney bêrê vurîyayene. Barê ekonomîkê na lîge hîna giran o, la Amedspor hîna gird o. Seba Amedspor û heme kulubê bajarî eşkeno yew bingeyêko qayim bêro viraştene. Sey şaredarî, lazim o ke seba heme şûbeyanê sporî yew binawanîya bihêze bêro viraştene. Ganî ma biewnîyê ke ma seba kamcîn amancî binawanî virazê, no ganî zelal bibo. Ma wazenê ke ma heme branşan de binawanîyêka sporî ya bihêze virazê. Ganî Amed de tesîsê olîmpîkî bêrê viraştene. Ganî stadyumê ke seba musabeqayanê neteweyî û mîyanneteweyî munasib ê, bêrê viraştene. Xebatê ma est ê, ma do serrêk de seba heme qadanê sporî yew bingeyo gird û binawanîyêk virazê. Ma yew Amedsporo yewbîyaye wazenê. Ma seba ekîb û tîmî serkewtene wazenê."

Badê qiseykerdişan qûrdele ame birnayene û magaza ame akerdene.