Hemşaredaranê Şaredarîya Amedî ya Şaristanê Girdî Serra Bucak û Dogan Hatunî, qezaya Sûrî de Taxa Savaşî de Kuçeyê Parêzer Tahîr Elçî akerd.

Bi qerarê muşterekê Şaredarîya Şaristanê Girdî û Şaredarîya Sûrî, nameyê qismêkê Kuçeyê Berê Neweyî yê Taxa Savaşî ame vurîyayene. Qismê Kuçeya Berê Neweyî yo ke heta Minareyê Çarlinge ra şono, nameyê Tahîr Elçî ci rê ame dayene ke Serekê Baroya Amedî bî û 28ê Teşrîna Peyêne ya 2015î de vera Minareyê Çarlinge de bi êrîşêko çekin cuya xo vîndî kerdbî.

Programê akerdişê Kuçeyê Parêzer Tahîr Elçî de, Hemşaredarê Şaredarîya Amedî ya Şaristanê Girdî Serra Bucak û Dogan Hatun, Hemşaredarê Şaredarîya Sûrî Fatma Gulan Onkol û Adnan Orhan, cinîya Tahîr Elçî Turkan Elçî, Serekê Baroya Amedî Ebdulqadîr Guleç û endamê meclîsî beşdar bîyî.

Hemşaredare Bucak: Vurîyayîşê nameyê kuçeyî manîdar o

Hemşaredare Bucak akerdişê kuçe de qisey kerd û ard vîrê şarî ke înan vizêr vera Minareyê Çarlinge de Tahîr Elçî yo ke 9 serrî verê cû amebî qetilkerdene, yad kerd û wina va: "Vurîyayîşê nameyê no kuçe sey Kuçeyê Tahîr Elçî zaf qîmetin û manîdar o. Ez seba fikr û tetbîqatanê înan derheqê naye de, Hemşaredaranê Şaredarîya Sûrî, endamanê meclîsî û îdareyî rê zaf sipas kena."

'Seba xebatanê vîrî hêvî dano'

Bucak va ke cografyaya ke ma tede ciwîyenê yew cografyaya derdine û kederin a û wina dewam kerd: "Yew aqil, yew nêzdîbîyayîşê komelkî est o ke vano 'Ma nêkenê vîndî, ma tîya de yê û ma do wayîrîye vîrê xo vejîyê'. La ganî ma naye hîna zêde vila bikê. Reyna nimûneyê bînî dinya de, cografyayanê bînan de xebatê vîrî û rîbirîbîyayîşî, heqîqet û xebatê eleqedarê naye tewr zaf seba ma yew nimûneyo muhîm o. Her çiqas na xebata heqîqet, rîbirîbîyayîş û vîrînêkerdişî hema qonaxê destpêkî de bo zî seba ma zaf hêvî dano. Seba xebatanê vîrî ke ma do badê naye bikê û vejîyê meydan, hêvî dano."

Bucak qeyd kerd ke nê kuçeyî de 9 serrî verê cû yew pawitoxê heqê însanan o cesûr ame qetilkerdene û wina va: "Bi dayîşê nameyê Tahîr Elçîyî yê nê kuçeyî ma eynî wext de mêmananê ke yenê zîyaretê bajarê ma, vera Minareyê Çarlinge de pawenê ke ê do bi nê ciddîyetî biewnîyê nê nameyî û vajê 'Helbet tîya de yew vîrardene, yew abîde û yew şîn esto' û do Minareya Çarlinge zîyaret bikê. Ma zanê ke vengdayîşê naye seba ma yew wezîfe û mesulîyet o."

Badê qiseykerdişan Hemşaredare Bucak û kesê ke aye reyde bî, tabelaya ke ser o "Kuçeyê Parêzer Tahîr Elçî" nusîyaye bî, kuçe ra darde we.