Hemşaredarê Şaredarîya Amedî ya Şaristanê Girdî Serra Bucak û Dogan Hatun, beşdarê akerdişê Fuarê 8. yê Kitaban bîyî. Hemşaredare Bucak va ke bi hêzê zanayîşê bêsansurî mumkin o ke merdim ewro awan bikero û rayîr akero verba ameyoxêko roşn.

Hemşaredarê Şaredarîya Şaristanê Girdî Serra Bucak û Dogan Hatun, beşdarê akerdişê Fuarê 8. yê Kitaban ê Amedî bîyî ke hetê TUYAP û Yewîya Weşankaranê Tirkîya ra pîya Merkezê Kongre yê Mezopotamya de ameyo organîzekerdene û do heta 8ê Kanûnî dewam bikero.

Hemşaredaran ra teber, Hemşaredara Şaredarîya Farqînî Sevim Biçici, Hemşaredara Şaredarîya Kayapinarî Berivan Gulşen Sincar, Hemşaredara Şaredarîya Çinarî Semra Akyuz, endamê meclîsê şaredarîye, Serekê Odaya Bazirganî ya Amedî (DTSO) Mehmet Kaya, Serekê Yewîya Weşankaranê Tirkîya û zaf temsîlkarê rêxistinanê komelê sivîlî beşdarê fuarî bîyî.

Hemşaredare Bucak: Ma wazenê yew nîzamo adîl awan bikê

Hemşaredare Bucak ke akerdişê fuarî de qisey kerd, va ke îhtîyacê normalîzebîyayîşî meselayanê welatî ra tewr muhîman ra yew o. Bucak wina va: "Eke ewro fuarê kitaban kêmî benê, hamleyê averşîyayîşê ekonomîkî û cuyê komelkî zî kêmî benê, o wext prosesêk est o ke tesîrêko xorîn dano komelî. Ma wazenê heme bajaranê ma de, heme cografyaya ma de yew nîzamo demokratîk, adil, azad û seypê awan bikê. Ma zaf baş dî û tecribe kerd ke demê polîtîkaya cîyakerdişî de bajarê ma senî rastê tehdayî ameyî."

'Atmosferêk lazim o ke tede fikirî nêrê sansurkerdiş'

Hemşaredare Bucak bale ant ser ke kitabî, çîyo ke zereyê înan de nusîyayo, înan rê vilabîyayîşê azadê nuşteyan lazim o û wina dewam kerd: "Atmosferêk lazim o ke tede sansur çin bo, fikrî nêrê sansurkerdiş. Kitabî teyna wasitayê zanayîşî nîyê, ca yê ke tede komelî yenê têhet û roşnvîrîya komelkî yena temînkerdene. Ma sey rayberîyanê herêmkîyan, ma nê berpirsîyarîyî zanê. Ma do sey Şaredarîya Şaristanê Girdî, badê ney organîzekerdişê fuaranê hîna başan û ardişê kitabheskerdoxan ê tîyayî biafirnê."

'Ma xebata fîzîbîlîte seba kitabxaneyan dewam kenê'

Bucak va ke ê sey hemşaredarî û heme unsuranê bajarî wazenê fuaranê hîna hîrayan organîze bikerê û wina dewam kerd: "Çi heyf ke serranê peyênan de seba krîzê ekonomîkî hem weşanxaneyî hem zî wendoxî krîzêko giran ciwîyenê. Coka resayîşê aktîvîteyanê kulturî hetê ekonomîk ra yeno astengkerdene. 8 aşmî yo ke ma weçînîyayê, ma xebata fîzîbîlîte ya derheqê kitabxaneyan de ke verê cû est bî, dewam kenê."

'Mumkin o ke rayîr akerê verba ameyoxêko roşn'

Bucak weşanxaneyê ke fuarî de ca gênê û weşankarê ke nê warî de weşanan kenê, seba azm û cehdê înan yê ke heme çetinîyan reyde rî bi rî yê, pîroz kerdî û sipasîya xo pêşkêşê heme kesan kerd ke seba viraştişê fuarî kede daya. Bucak bi vatişê "Bi hêzê zanayîşê bêsansurî mumkin o ke merdim ewro awan bikero û rayîr akero verba ameyoxêko roşn" qiseyê xo qedênayî.

Fuarê Kitaban ame akerdene

Badê qiseykerdişan hemşaredarî û heme mêmanê ke protokolê akerdişî de ca girewtî, qordele birna û fuar akerd.

Hemşaredarî standan ra gêrayî

Akerdişê fuarî ke tede 216 weşanxaneyî ca gênê û standê Şaredarîya Şaristanê Girdî zî tede yo, eleqeyêko zaf kitabheskerdoxan ra dî. Fuarî de hemşaredarî ke standan ra gêrayî, eleqeyêko zaf dî. Hemşaredarî weşanger û kitabheskerdoxan reyde sohbet kerd û derheqê fuarî de malumatî girewtî û dayî.

Hetkarê Sekreterê Pêroyî Zerin Turk, akerdişê Fuarê Kitaban û zîyaretê standan de hemşaredaran reyde bîy.