Serekê Daîreya Resî ya Şaredarîya Amedî ya Şaristanê Girdî Temel Cengizî va ke goreyê protokolê ke Kooperatîfê Berdiş û Ardişê Raywanan yê Bejî reyde îmza bîyo, raywanê ke kartanê bêpere û erjaninan xebitnenê, êdî do bêproblem bieşkê Otobusanê Xususî yê Şarî ra îstîfade bikê.

Serekîya Daîreya Resî, seba ke bajarî rê xizmetê resê pêroyî yo rehet, modern û tesîrin pêşkêş bibo, xebatanê xo dewam kena. Goreyê protokolê ke Şaredarîya Şaristanê Girdî, S.S. 53 Numreyina Kooperatîfê Berdiş û Ardişê Raywanan yê Bejî yê Otobusanê Xususî yê Şarî yê Amedî reyde îmza kerdo, raywanê ke wayîrê kartanê bêpere û erjaninîan ê, êdî do bêproblem bieşkê Otobusanê Xususî yê Şarî ra îstîfade bikê. Şaro ke problem anceno, eke xeta ALO 153î rê gazine xo bikero, derheqê şoforan de muameleyo cezayî do bêro tetbîqkerdene.

'Derheqê probleman teqez xeta 153î bigêrê’

Serekê Daîreya Resî Temel Cengizî derheqê mesela de malumat da û va ke seba ke şarê astengdar û şarê ke emrê înan 65î ra cor o reyna problem nêancê, heqê wenîştişî hetê Şaredarîya Şaristanê Girdî ra yeno dayene. Cengizî waşt ke şarê ke problem anceno xeta 153î rê telefon bikero û va ke şoforê ke bêrê gazinkerdene do cezayêko giran bigîrê.

Cengizî wina va: "Seke yeno zanayene, 26ê teşrîna peyêne de Otobusanê Şarî yê Xususîyan reyde protokol ame îmzakerdene. Bi nê protokolî amanco ke yeno waştene resêko hîna rehet û hîna ewle yo. Yew madeya nê protokolî wenîştişanê bêpereyan ser o ya. Bi taybetî seba ke şarê ma yo astengdar, şarê ma yo ke emrê xo 65î ra cor o reyna problem nêanco, heqê wenîştişî hetê şaredarîya ma ra yeno dayene. Ma wazenê ke no wina bêro zanayene. Ma wazenê ke badê ney eke problemî bivejîyê, teqez xeta 153î rê bêro gêrayene. Derheqê naye de protokol de cezayê zaf cidî est ê."