Konseya Bajarî ya Amedî ke badê qeyyûman padîyaybîye, badê ke Serra Bucak û Dogan Hatun 8 serran ra dima bîyî Hemşaredarê Şaredarîya Amedî ya Şaristanê Girdî, reyna dest bi xebatan kerd û Meclîsê Kultur û Hunerî awan kerd. Meclîsî Kombîyayîşê xo yo Asayî yo 1. Merkezê Kultur û Kongre yê ÇandAmedî de viraşt. Endamê Komîsyonê Kultur û Hunerî yê Meclîsê Şaredarîye Redur Dîcle Aydin, Canan Efe, Ebru Yilmaz û Evîn Ay û xeylê kesê ke qadê kultur û hunerî de aktîf ê, beşdarê kombîyayîşî bîyî.

Sekretêra Pêroyî ya Meclîsê Bajarî Selvî Tunc ke qiseyê akerdişî yê kombîyayîşî ke badê weçînayîşê Komîteyê Meclîsî dest pêkerd kerdî, dîyar kerd ke Konseya Bajarî çi ya û cuya bajarî de çi vurîyayo. Endamê Heyetê Îdareyî yê Meclîsê Şaredarîye Şerko Kaniwarî bale ant xeripnayîşê kultur û hunerî yê demê qeyyûman ser.

Îdareyê meclîsî ame dîyarkerdene

Badê qiseykerdişan îdareyê meclîsê 8 kesan ame dîyarkerdene. Meclîs do rojanê ameyoxan de hemşaredaranê xo biweçîno.