Şaredarîya Amedî ya Şaristanê Girdî, seba ke şarê astengdar ke qezaya Pîranî de ciwîyeno, rehet şêro keyeyanê xo, 2 hezar û 950 metreyî 5 rayîran ser o parke ronaye. Şarê astengdarî xizmetî ra ke ameyî kerdene, kêfweş bî û sipasîya xo Şaredarîya Şaristanê Girdî rê kerd.

Şefîya Xizmetanê Dewan ke girêdayeyê Serekîya Daîreya Viraştişê Rayîran û Koordînasyonê Binawanî ya, bi waştişê Şaredarîya Pîranî xebata rayîrî dewam kena û seba ke şarê astengdar rehet şêrê-bêrê parke zî dekerde mîyanê xebata xo.

Na çarçewa de ekîban, Dewa Çayustî de cayê Îsa Aydînê astengdarî rê hîrê metre û nêm hîrayîye û 800 metreyî dergîye de; Dewa Dogerî de Ebdurrehman Aslanî rê çar metre hîrayîye û 200 metreyî dergîye de, Gulçîçek Kaynake rê zî hîrê metre hîrayîye û 150 metreyî dergîye de; Mezraya Rezan ê Dewa Dogerî de Ehmed Cengîzî rê çar metre hîrayîye û 800 metreyî dergîye de; Dewa Pinarî de Nesîm Ateşî rê zî hîrê metre hîrayîye û hezar metreyî dergîye de pêro pîya 2 hezar û 950 metre rayîrî ser o parke ronaye.

Şarê astengdar o ke xizmetê rayîrî ra zaf kêfweş bî, bi erebeyanê tekerlekinan yan zî akuyinan do hîna rehet şêrê û bêrê.

'Rayîrê ma çin bî, astengê ma est bî'

Lajê Ehmed Cengîzê astengdarî Heybet Cengîzî ke xizmetê rayîrî ra kêfweşîya xo ard ziwan û va: "Rayîrê ma çin bî, astengê ma est bî. Ambulans nêeşkayêne bêro vera keyeyê ma. Weş û war bê, Şaredarîya Şaristanê Girdî ameye rayîrê ma viraşt. Zaf rind zî viraşt. Ma zaf sipas kenê înan rê. Her çîyo ke destê înan ra ame, înan kerd. Heq razî bo ke înan rayîrê ma viraşt."

'Êdî erebeyî şênê heta verê keyeyê mi bêrê'

Şukrîye Aslan ke astengdar a û verê ke rayîrê înan bêro viraştene bi sandalîya tekerlekine heta rayîrê serekeyî ke ambulanse uca vindertêne zaf zehmetî antêne, va ke êdî erebeyî şênê bêrê verê keyeyê aye. Aslan kêfweşîya xo ya xizmetê rayîrî wina ard ziwan: "Ez bi sandalîya tekerlekine berdêne cêr. Heta ke berdêne ez merdêne. Ambulanse nêeşkayêne bêro verê keyeyê ma. Şukur nika rayîrê ma viraşt. Heq kêmaneyê înan nêmojno. Verê ke no rayîrê ma bêro viraştene ambulans nêeşkayêne bêro. Erebeya dîyalîzî nêeşkayêne bêro. Rayîrê ma rast nêbî coka heta ke ez bi sandalîya tekerlekine berdêne zerrîya mi vejîyayêne. Heq razî bo înan ra ke rayîrê ma viraşt. Ez seke newe ra maya xo ra bîya xo hîs kena."

'Rayîrê ma bîyo zaf weş'

Gulçîçek Kaynak ke nêweşa losemî ya û va ke rayîrê înan ameyo viraştene coka a kêfweş a û sipasîya xo Şaredarîya Amedî ya Şaristanê Girdî rê kerde. Pîyê aye Mehmet Kaynakî zî va ke verê cû rayîrê înan çal bî coka rewşanê acîlan de ambulans nêeşkayêne bêro keyeyê înan.

Mehmet Kaynakî ke sipasîya xo Şaredarîya Amedî ya Şaristanê Girdî rê kerd wina qisey kerd: "Ma muracatê Şaredarîya Şaristanê Girdî kerd, înan rayîrê ma viraşt. Ne erebeyî ne zî ambulansî eşkayêne şêrê-bêrê. Nika rayîrê ma zaf weş bîyo."

"Ma muracatê Şaredarîya Şaristanê Girdî kerd, ameye rayîrê ma viraşt"

Nesîm Ateşo ke astengdar o, wina va: "13 serrî yo ez na rewşe de ya. Problemê rayîrê ma bî. Verê cû her ke ez şîyêne nêweşxane birayê mi ez pişt û milê xo de berdêne. Ma muracatê Şaredarîya Şaristanê Girdî kerd. Ameye rayîrê ma viraşt. Ez sipasîya xo Şaredarîya Amedî ya Şaristanê Girdî û Şaredarîya Pîranî rê kena ke nê rayîrê ma viraştî."

Birayê Nesîm Ateşî Ebdullatîf Ateşî wina qisey kerd: "Birayê mi 13 serrî yo ke astengdar o. Verê cû ma birayê xo xo pişt de berdêne heta cor. Nika ez zaf sipas kena Şaredarîya Pîran û Şaredarîya Amedî ya Şaristanê Girdî rê. Bi wasitaya her dîyan nika rayîrê ma ame viraştene."