Şaredarîya Amedî ya Şaristanê Girdî, çarçewaya Stratejî û Planê Karî yê Bajaranê Zîrekan de Sîstemê Zanayîşê Bajarî yê keyepelê xo newe kena.

Mudirîya Şûbê Sîstemanê Zanayîşê Cografî ya Serekîya Daîreya Zanakirarî, modulê 'Sîstemê Zanayîşê Bajarî' yê keyepelê (diyarbakir.bel.tr) Şaredarîya Amedî ya Şaristanê Girdî de zaf çîyê neweyî kerdî. Bi no hewa şarê Dîyarbekirî do pê Rehberê Bajarî rehet biresê zaf zanayîşan.

Xoresnayîş êdî zaf asan o

Şar do bieşko eczaxaneyê nobedarî, adrese û zanayîşê têkilî bimûsê. Nînan ra teber, zanayîşê AFAD'î yê 'Erdlerzê Peyênî' zî asan yeno vînayene.

Sîstemê Zanayîşê Bajarî wayîrê xusûsîyetê persê adresî yo ke bi Sîstemê Qeydê Adresa Mekanî (MAKS) ra entegre yo û merdim eşkeno zanayîşê rayîran, awanîyan, hûmaran û Kodê MAKS’î bivîno. Şar eşkeno zanayîşê cayê bazaran û tarîxê înan, û seba rewşanê awarteyan zanayîşê Cayanê Kombîyayîşê Acîlan zî bivîno.

Bi na xebate, şar eşkeno Planê Regulasyonê Derûdorî yê 1/100.000î û zanayîşê Planê Îmarê Nazimî yê 1/5000î yê parselan bivîno.

Şar do bi xarîtayanê cîya-cîyayan ê înternetî (OSM, Google, Yandex, Bing) û fotografê peykî/ortofotoyî reyde bieşko bajarî hîna bi detay keşf bikero.

Şaredarîya Amedî ya Şaristanê Girdî ke bi projeyê dîjîtalî resayîşê zanayîşan asan kena, wazena ke averşîyayîşê dîjîtalî yê bajarî hîna leze bikero û kalîteya ciwîyayîşî berz bikero.