Şaredarîya Amedî ya Şaristanê Girdî seba ke problemanê cinîyanê ke goşê înan nêeşnaweno çareser bikero, înan reyde ameye têhet û munaqeşeyê çareserîye kerdî.

Serekîya Daîreya Xizmetê Cinî û Keyeyî, xebatanê xo yê vera şîdetê cinîyan dewam kena. Na çarçewa de Serekîya Daîreya Xizmetê Cinî û Keyeyî û Komîsyonê Cinîyan ê Meclîsê Şaristanê Girdî, cinîyanê Komîsyonê Astengdaran ê Şaredarîya Yenîşehîrî reyde kombîyayîşêk organize kerd û tede waştiş û pêşnîyazê çareserîya problemanê cinîyanê ke goşê înan nêeşnaweno ameyî munaqeşekerdene.

Kombîyayîşî de ke Federasyonê Bêastengî yê Qezaya Yenîşehîrî de ame viraştene, Sereka Daîreya Xizmetê Cinî û Keyeyî Ozden Gurbuz Sumer û Endama Meclîsê Şaristanê Girdî Demet Ceylan beşdar bîyî.

'Problemê şîdetê cinîyan hîna zaf cinîyanê astengdaran rê tesîr keno'

Sereka Daîreya Xizmetê Cinî û Keyeyî Ozden Gurbuz Sumer va ke cinîyê ke goşê înan nêeşnaweno zafêr keyeyan de manenê û nêeşkenê bivejîyê teber, nêeşkenê kar bivînê û coka zî rehetêr marûzê şîdetî manenê. Sumer îlawe kerd ke ê do na rewşe rê çare bivînê û nê kombîyayîşî ra dima zî do kombîyayîşanê nê tewiran dewam bikê. 

Cinîyan waştişê xo yê çend kurs û atolyeyan dîyar kerdî û waşt ke seba sosyalîzebîyayîşî zî firsend bivînê. Înan waştişê merkezê vengdayîşî kerd û Sumer zî va ke ê do nê waştişî ser o bixebitîyê û do Serekîya Daîreya Xizmetê Astengdar û Pîran reyde pîya nê çî ser o xebatan bikerê.