Pêşengîya Şaredarîya Amedî ya Şaristanê Girdî de seba ke waştişanê şarî rê çare bêro dîyene, hemkarîya 4 şaredarîyanê qezayanê merkezî de xebatanê awankerdişê Koordînasyonê Têkilîyanê Şarî dest pêkerd.

Şaredarîya Şaristanê Girdî seba ke şar hîna rehet bieşko bireso rayberîyanê herêmkîyan dest bi xebate kerd. Na çarçewa de pêşengîya Şaredarîya Şaristanê Girdî de, hemkarîya Mudirîya Pêroyî ya DÎSKÎ û şaredarîyanê Baglar, Yenîşehîr, Kayapinar û Sûrî de seba ke Koordînasyonê Têkilîyanê Şarî bêro awankerdiş, kombîyayîşo yewin ame viraştene.

Kombîyayîşî de ke awanîya xizmetî ya Şaredarîya Şaristanê Girdî de ame viraştene, Hetkarê Sekreterê Pêroyî Nurhak Sînan Akincî, Sereka Daîreya Çapemenî û Têkilîyanê Şarî Berîvan Guneş, Mudira Şûbeyê Têkilîyanê Şarî Solmaz Okten, endamê Meclîsê Şaredarîye û personalê têkilîyanê şarî yê 4 şaredarîyanê qezayanê merkezî beşdar bîyî.

Sereka Daîreya Çapemenî û Têkilîyanê Şarî Guneş va ke seba parkerdişê wezîfe û selahîyetê Şaredarîya Şaristanê Girdî û şaredarîyan û seba xebatanê hişyarkerdiş û rayîrnîşandayîşî yê beşanê eleqedaran hetê têkilîyanê şarî ra nê kombîyayîşî kenê.

Kombîyayîşî de ame destgirewtene ke do 4 qezayanê merkezî de yew taxa pîlote ke kesê dezavantajî tede est ê, bêro weçînayene û xebatê hemparî yê warê sosyal û kulturî bêrê kerdene; do şaredarîyanê qezayan reyde muxtarî bêrê zîyaretkerdiş û tesbîtê cayan bêrê kerdene û do şaredarîyanê qezayan reyde xebatê nasnameyî yê turîzmî bêrê kerdene.