Şaredarîya Amedî ya Şaristanê Girdî şûbeyê hîrêyin yê Aşxaneyê Şarî Taxa Îskenderpaşa ya Qezaya Sûrî de akerd. Aşxane ke roja yewşemeyî ra teber heme rojan de saete 11:30 ra heta 18:00 de xizmet dano, çar tewir werdan 70 lîre dano. Şaro ke Aşxaneyî ra xizmet gêno, hem weşbîyayîşê werdan ra hem zî erjanîya înan ra kêfweş o.

Erkan Elaltintaşî ke ey ra pers bîyo, va: "Yew sîmît û do 35 lîre yo la tîya de çar tewir werdî 70 lîre yo, no xeyrêko gird o. Ganî her taxe de akero." Servet Ozkaynakî zî va: "No xizmetêko pîl o şarê ma rê. Werdî hem pak hem zî weş ê, ma zaf kêfweş ê. Her ca de akero ke şarê ma îstîfade biko."

Selamî Meralî zî va "Krizêko ekonomîk yo girs est o, êdî şar nêşêno hîrê zeytûnan zî biwero. Şaredarîya ma no karo weş kerdo û ney ra fehm beno ke şaredarîya şarî senî bena." Îhsan Palayî zî va: "Ez teqawit a, teber ra ma nêşênê werdêk biwerê la tîya erjan o. Heq razî bo înan ra."