Mudirîya Pêroyî ya DÎSKÎ ya Şaredarîya Amedî ya Şaristanê Girdî, bi projeyê Îdareyê Zîreki yê Awe hem vindbîyayîşê awe kêmî kena hem zî gurênayîşê çimeyan aver bena. Proje bi binawanîya xo ya moderne do Amedî rê xizmetê awa şimitişî ya weşe pêşkêş bikero.

Mudirîya Pêroyî ya DÎSKÎ, seba ke çimeyê awe hîna weş bêrê gurênayene "Projeyê Îdareyê Zîreki yê Awa Şimitişî ya Merkezê Amedî" dana destpêkerdene. Proje do vindbîyayîş û dizdîya awa şimitişî kêmî bikero.

Peymitişo Zîrek do vernîya israfî bigîro

Proje de bajarî de 104 Qada Peymitişî ya Îzole (DMA) û 22 odaya debîmetreyî yena ronayene. Debîmetre amûrêk o ke borîyan ra awa ke vîyarena pêmeno û bi no hewa vindbîyayîş û dizdîya awe rehet yena tesbîtkerdene. Heta nika 42 DMA û 8 odayê debîmetreyî qedîyayê. Xebatê ke mendê do menga nîsane de biqedîyê.

Şerîfoglu: Pawitişê çimeyan karê ma yo yewin o

Mudirê Pêroyî yê DÎSKÎ Mehmet Şerîfoglu bale ant muhîmîya çimeyanê awe ser o û wina va: "Ma binawanîya depo, pêmitiş û qadanê saetan temam kenê û sîstemê kontrolkerdişî û îdarekerdişê merkezî dewre de yê. Ma bi nê projeyî hem vindbîyayîşê awe hem zî dizdîye kêmî kenê û wazenê ke şarê xo rê xizmetêko hîna weş pêşkêş bikerê û çimeyanê xo bipawê."

Çimeyê awe do tesîrin bêrê gurênayene

Gama ke proje biqedîyo, binawanîya awa şimitişî ya Amedî do bibo wayîrê sîstemêkê îdarekerdişî yê modernî. Bi no hewa vindbîyayîş û dizîye do kêm bibê û çimeyê awe do hîna tesîrin bêrê gurênayene. No proje bi vindarnayîşê îsrafê awe do piştî bido weşîya derûdorî zî.