Hemşaredarê Şaredarîya Amedî ya Şaristanê Girdî Dogan Hatun, beşdarê panelê "Migirdiçê Dîkranyano Amedij û Tekstê Kurdkî yê Herfanê Armenîyan" bî û dîyar kerd ke ê do mîrasê zafziwanî û zafkulturî rê wayîr vejîyê.

Panelo ke Serekîya Daîreya Karê Kultur û Sosyalî çarçewaya aktîvîteyanê 21ê Sibate Roja Ziwanê Dayîke de Dêra Surp Gîragosî de organîze kerd, Hemşaredar Hatun û tede Hemşaredarê Şaredarîya Sûrî Adnan Orhan, Sereka Daîreya Karê Kultur û Sosyalî Zeynep Yaş, temsîlkarê rêxistinanê sivîlan û ziwannasî beşdar bîyî.

Hemşaredar Hatun qiseykerdişê xo de bale ant ke Amed bajarêko kurd o la eynî wext de bajarêko zafziwanî yo û va "Ma do zafziwanîye rê wayîr bivejîyê. Kulturê ma û eserê tarîxî yê nê bajarî nimûneyê tewr eşkera yê nê zafhetî yê. No mîras ma rê mendo."

Hemşaredarî qeyd kerd ke Migirdiç Dîkranyan bi herfanê armenîyan kurdkî nuşto û no kultur sey mîras dewrê ma kerdo. Hatunî dîyar kerd ke ê do nê kulturê zafziwanîya bajarî hîna gird bikerê û dinya rê vila bikerê.

Hatunî derheqê dersanê ziwanan de va: "Bi taybetî muhîm o ke ma suryanîkî û zazakî ke rîskê vîndîbîyayîşî de yê bipawê û aver berê. Ganî musayîşê ziwanê dayîke tena keyeyn de ney, mekteban de zî bibo. Ma ganî mîrasê ke dayîkan seserran ra ver mar rê resnayo, bidê ciwîyanene."