Hemşaredarê Şaredarîya Amedî ya Şaristanê Girdî Dogan Hatun ke nobedarîya ke Wanî de dewam kena de qisey kerde, dîyar kerd ke şarê Wanî 3 rojî yo bi şewe û roj wayîrê îradeyê xo vejîyeno.

Dima ke Hemşaredarê Şaredarîya Wanî ya Şaristanê Girdî Abdullah Zeydanî rê cezaya 3 serrî û 9 aşmî ameye dayene, nobedarîya ke vera şaredarîye de ameya destpêkerdene roja 4. de dewam kena. Hemşaredarê Şaredarîya Amedî ya Şaristanê Girdî Dogan Hatun ke dima ke Zeydanî rê ceza ameye dayene şî Wan û 3 rojî yo piştî dano nobedarîye, şewe şarî reyde vera awanîya şaredarîye de vîyarna.

Hemşaredar Hatun: Îradeyê şarê Wanî tîya der o

Hemşaredar Dogan Hatunî tîya de veng da şarî û dîyar kerd ke ê şahidê keda şarî yê û wina va: "Ma fikirîyenê ke çimê Enqera zî tîya der o. Û no eserê şima yo. Ma zanê ke ê çira keda şima ra tersenê. Çunke îradeyê şarê Wanî tîya der o. Ê wazenê ê îradeyî wedarê. La şima hîrê şewî û hîrê rojî yo tîya de xover danê. No, nîşan dano ke şima wayîrê îradeyê xo vejîyenê."

Hemserekê GABB’î Siraç Çelîkî zî îfade kerd ke şarê Wanî wayîrê îradeyê xo vejîyeno û seba hewayê serdî zî bi rojan o ke tîya ca nêverdayo.