Hemşaredara Şaredarîya Amedî ya Şaristanê Girdî Serra Bucakî, Serekîya Daîreya Koordînasyonê Rayîrpawîtişî û Binawanî ke vera vewre de amadekarîyê xo qedênayê, ca de etud kerd.

Hemşaredare Bucak dîyar kerd ke merkezê bajarî de qet problemêk çin o û ekîbî seba rewşanê lezgînan hazir pawenê.

Merkezê Amedî de şilope, qezayanê cayê berzan de zî varayîşê vewre tesîr keno. Serekîya Daîreya Koordînasyonê Rayîrpawîtişî û Binawanî û Mudirîya Pêroyî ya DÎSKÎ seba ke res û binawanî de problemêk nêvejîyo heme tedbîrê lazimî girewtî. Serekîya Daîre merkezê bajarî û rayîranê taxanê dewan de 6 şantîyeyan de, 100 personel û 62 ekîban reyde xebatê xo dewam kena. Hemşaredare Bucak wa ke şarê Amedî qet meraq nêkero, qet problemêk çin o, ekîbê ma hazir ê û tedbîrê înan temam ê. Seba rewşanê lezgînan şarê ma eşkeno ALO 153î reyde têkilî ronê. Bucak bale ant ke seba ke cemed bibo 1.200 ton têmîyanîya sole hazir a û eke şarê ma mecbur nêmanê wa keyeyan ra nêvejîyê û resê komkî ra îstîfade bikerê.