Hemşaredarê Şaredarîya Amedî ya Şaristanê Girdî Dogan Hatunî beşdarê kombîyayîşê awankerdişê Meclîsê Sporî yê Meclîsê Bajarî bî û dîyar kerd ke ganî ê seba zêdekerdişê tesîsanê sporî yê bajarê ke 2 mîlyonî nufusê xo est o, polîtîkayêk virazê.

Meclîsê Bajarî yê Amedî ke badê 8 serran reyna dest bi fealîyetan kerdo, Meclîsê Sporî awan kerd. Meclîsî Kombîyayîşê Xo yê Asayî yo 1. Merkezê Kultur û Kongre yê Çand Amedî de organize kerd. Kombîyayîşî de Hemşaredar Dogan Hatun, Serekê Daîreya Xizmetê Ciwan û Sporî Baran Yilmaz, endamê Komîsyonê Sporî yê Meclîsê Şaredarîya Amedî ya Şaristanê Girdî, Federasyonê Klubanê Sporî yê Amatoran, rayberê Komela Antrenoranê Futbolî yê Tirkîya û temsîlkarê rêxistinanê sivîlan beşdarê ci bîyî.

Hatunî dîyar kerd ke tesîsê sporî Amedî de bes nîyê û va: "Yew bajaro ke 100 hezar nufusê ci est o, tede 100 ra vêşêr tesîsê sporî ganî bibê, la Amed de nê tesîsî çin ê." Hatunî va ke tesîsê ke şaredarîye viraştê, îdareyê bînan rê ameyo dayene û nê tesîsî sewbîna çîyan rê yenê şuxulnayene. Hatunî seba çareyî veng da walîyê Amedî û waşt ke tesîsî seba şuxulnayîşî şaredarîye rê bêrê apeydayene.

Hemşaredar Hatunî derheqê Stadyumê Amedî de zî va: "Eşkayîşê îdareyê zirçî zî çin o. Eke şima nêşenê îdare bikerê, ma sey Şaredarîya Şaristanê Girdî wazênê. Ma rê bidê kîra. Ma protokolê xo îmza bikerê. Ma sey Şaredarîya Şaristanê Girdî do hemê problemanê ucayî safî bikerê."

Kombîyayîşî de 24 kesê endamê komîteyê îdarî ameyî weçînayene.