Meclîsê Cinîyan ê Şaredarîya Şaristanê Girdî ya Amedî, çarçewaya aktîvîteyanê 8ê Adare Roja Cinîyan a Dinya de, seba maçê Amedsporî û Gençlerbirlîgî ke 4ê Adare de yew tribun do cinîyan rê bêro abirînayene, cinîyan reyde muracatê Passolîgî yo komkî kerd.

Meclîsê Cinîyan ê Şaredarîya Şaristanê Girdî ke aktîvîteyê 8ê Adare Roja Cinîyan a Dinya 21ê Sibate de dest pêkerd, çarçewaya aktîvîteyanê 8ê Adare de, seba maçê Amedsporî û Gençlerbirlîgî ke 4ê Adare de yew tribun do cinîyan rê bêro abirînayene, cinîyan reyde muracatê Passolîgî (sîstemê bîletê elektronîkî) yo komkî kerd.

Muracatan ke kewtişê vakurî yê Stadyumê Amedî de virazîyayî, cinî zaf eleqedar bîyî.

'Ma do maçê Amedsporî de bibê'

Amine Kutlay ke Sekretaryaya Meclîsê Cinîyan ê Şaredarîya Şaristanê Girdî ra ya, va ke ê cehd kenê ke nêseypêyîya cinsîyetê komelkî wedarnê û cinî qada futbolî de ke camêrdî zaf ca gênê, hîna zêde biasê. Kutlay ke dîyar kerd ke ê do pankarta "Vatişê ma nêqedîyayo, ma do pîya şîdetî vindarnê" reyde tribun de ca bigîrê, va: "Ma seba ke hem Amedsporî rê hetkarî bikê hem zî vajê ke 'ma do her ca de estbîyayîşê xo dewam bikerê', ma do maçê Amedsporî de bibê."

'Muracatan de do cinîyan rê pozîtîfîye bêro kerdene'

Kutlay ke ard ziwan ke hem stadyumî de hem zî Amedstore de passolîg yeno vetene, dîyar kerd ke roja panşemeyî Amedstore de muracatê Passolîgî rê do cinîyan ra pozîtîfîye bêro kerdene. Kutlay va: "Ma do dewam bikê ke vajê 'Vatişê ma nêqedîyayo, ma do pîya şîdetî vindarnê'. Cinî do senî ke her ca xurt kenê nê cayî zî xurt bikê."