Şaredarîya Şaristanê Girdî, seba bajarêko hîna kesk û ameyoxî refuj, peyerayîr, çatrayîr û parkan de tewirê cîya-cîyayan yê 5 serran ra pîlêr bi pêroyî 10 hezar darî ronana.

Serekîya Daîreya Park û Baxçeyan, emser refuj, peyerayîr, çatrayîr û parkanê qezayanê Yenîşehîr, Baglar, Kayapinar û Sûrî de tewirê cîya-cîyayan yê 5 serran ra pîlêr bi pêroyî 10 hezar darî do rono.

Mudirîya Şûbeyê Fîdanlîk û Darûberinkerdişî ke demê ronayîşê daran de bi taybetî cayê îmarê neweyan ser o xebitîyena, na çarçewa de Cadeyê Teknoyî yê girêdayeyê qezaya Sûrî de 400, Cadeyê Hilarî yê Yenîşehîrî de 220, Cadeyê Bedrî Ayselî yê Kayapinarî de 150, Cadeyê Azadî yê Baglarî de 70 hebî daran do rono.

Demê ronayîşê daran de Serekîya Daîreya Park û Baxçeyan, teberê cayê îmarê neweyan de cade û bulwaranê bînan ê bajarî de zî xebatêka winasî do dewam bikero.

Mudirîya Şûbeyê Fîdanlîk û Darûberinkerdişî, teberê refuj, peyerayîr û çatrayîr de do 4 qezayanê merkezî de parkan de ke tede kêmasîyî est ê, daran rono.

Tewirê daran ke tasarufê awe kenê, tercîh bîyê

Serekîya Daîreya Park û Baxçeyan, xebatanê ronayîşê şitilan de bi taybetî tewirê daran ke goreyê îklîmê herêma ma yê, vera huşkîye de xopawitox ê û hewcedarîya înan a awe zêde nîya, tercîh kena.

Mudirîya Şûbeyê Fîdanlîk û Darûberinkerdiş, xebatanê ronayîşê daran reyde, seba ke cayê îmarê neweyî hîna estetîk biasê, xeylê cayê ke tespît bîyê, tede tewirê cîya-cîyayan bi pêroyî 25 hezar dar û şitilî do xo biresne herre.