Hemşaredara Şaredarîya Amedî ya Şaristanê Girdî Serra Bucak beşdarÊ Kombîyayîşê Amadekarîya Festîvalê Fîlmanê Amedî yê Mîyanneteweyî yê 3. bîye û va ke ê do bi festîvalêkê neweyî piştî bidê tarîxê sînemaya Amedî.

Kombîyayîşî de ke amancê ci berzkerdişê potansîyelê warê kultur û hunerî yê bajarî bî, Hemşaredare Serra Bucak, Hetkara Sekreterê Pêroyî Zerîn Turk, Sereka Daîreya Kultur û Karanê Sosyalan Zeynep Yaş û hunermendê ke warê fîlmanê kilman, dokumenteran û fîlmanê dergan de xebate kenê, beşdarê ci bîyî.

Hemşaredare Bucak, serkewtişê Heyetê Îmraliyî ra behs kerd û va do nê vengdayîşê tarîxî rê her warî ra piştî bidê. Aye dîyar kerd ke aşitî, kultur û huner zî keweno berpirsîyarîya înan û va ke, "Do ma aşitî û pîyayî festîvalanê fîlman de hîna zaf qisey bikê."

Bucak îfade kerd ke Amed seba sînema şaristanêko muhîm o û ard ziwan ke seba ci hîrê qonaxê tarîxî est ê: Festîvalê Fîlmanê Dokumenteran yê Fîlmamedî, Festîvalê Fîlmanê Yilmaz Guneyî yê Êlihî û Festîvalê Fîlmanê Mîyanneteweyî yê Amedî.

Bucak teqîb kerd ke demê qeyyûman de festîvalî vîyartî û nika gureyê înan est o ke festîvalêko newe bikê. Aye va ke ê do xoresayîşê fîlmanê weşan semedê heme cinî, ciwan û domanan awan bikê û îfade kerd ke hedefê înan o yo ke avankerdişê fîlmanê kurdkîyan hîra bibo.