Hemşaredarê Şaredarîya Amedî ya Şaristanê Girdî Dogan Hatun, beşdarê konserî bî ke bi munasebetê serrgêra Ma Musicî ya 8. de ameybî viraştene. Hatunî dîyar kerd ke heta ke gedeyî bêmûzîk nêmanê do kar û xebatanê xo dewam bikê.

Merkezê Kultur û Kongre yê Çand Amedî de konsero ke bi munasebetê serrgêra Ma Musicî ya 8. de ame organîzekerdene. Hemşaredarê Şaredarîya Şaristanê Girdî Dogan Hatun, Hemşaredarê Şaredarîya Mêrdînî ya Şaristanê Girdî Devrim Demir ke cayê aye de qeyyum tayîn bîyo, hemşaredarê şaredarîyanê qezayan, parlamenterî û endamê meclîsî zî beşdarê konserî bîyî.

Hemşaredar Hatun: Ma şahîdê keda şima yê

Hemşaredar Hatunî ke hunermendanê sahneyî rê vilikî pêşkêş kerdî, beşdaranê konseri rê silam da. Hemşaredar Hatunî ke merheleyê awanbîyayîşê Ma Musicî îzeh kerd, va: "11 embazî ke Ma Music awan kerdo, înan rê ma sipas kenê. 8 serrî bîyî. Ma zî şahîdê na keda şima yê. Kedkaranê Konservatuwara Aram Tîgranî, wina dest pêkerd. Bi rastî Aram Tîgran bi xo zî wina bî. Şima temburê ey erd de nêverda."

Hemşaredar Hatunî îfade kerd ke gedeyî do bêmûzîk nêmanenê û wina qisey kerd: "Ma tîya ra soz danê; heta ke qet yew gede zî bêkultur, bêhuner û bêmûzîk nêmano, ma do kar û xebatanê xo dewam bikê. Ma hetê şarê xo de yê."