Şaredarîya Amedî ya Şaristanê Girdî, seba cayê dekewtiş û vejîyayîşê şaristanî ke bi serran o ke bala xo nêdîyo ser û halêko xirab de verdîyayê, hîna ekolojîk û modern bibê, xebata peyzajî ya hîraye dana destpêkerdene.

Serekîya Daîreya Park û Baxçeyan, seba ke dekewtiş û vejîyayîşê şaristanî ekosîstemî reyde bibo têkildar û kesk û estetîk bibo, peya û resê trafîkî hîna emnîyetin bibê, projeyan hazir kena.

Trafîk do bibo hîna emnîyetin

Xebata newekerdişî ya rayîranê Mêrdîn, Riha, Xarpêt û Farqînî ke cayê berpirsîyarîya Rayberîya Rayîran a 9. Mintiqaye de yo, Şaredarîya Amedî ya Şaristanê Girdî kena. Projeya ke hetê Şaredarîya Şaristanê Girdî ra ameyo viraştene û plankerdiş, bi xebata peyzajî ke do bêro kerdene, trafîkê peya û erebeyan do bibo hîna emnîyetin.

Do xebatêka peyzajî ya 78 kîlometreyî bêra kerdene

Projeya ke ekosîstemî reyde têkildar a û do hetê estetîkî ra asayîşêko muhîm bido şaristanî, rayîrê Riha de şîyayîş-ameyîş 28 kîlometre, yê Xarpêtî de 18 kîlometre, yê Mêrdînî de 22 kîlometre û yê Farqînî de 20 kîlometre, pêro pîya cayêko 78 kîlometreyî de xebata peyzajî do bêro kerdene.

Do rayîrê bisîkletan bêrê viraştene

Rayîrê Amed-Riha de her di hetan ra 28 kîlometreyî de, sîtil û refuj de do xebatê peyzajî bêrê kerdene. Do 10 kîlometre rayîrê bisîkletan bêro viraştene, seba peyayan zî do cayê vindertişî bêrê hazirkerdene.

Xebatê peyzajê huşkî zî do bêrê kerdene

Çîyo tewr muhîmo ke projeyî de bîyo hedef, pawitişê awe û şuxulnayîşê daristan û peyzajê huşkî yo ke îklîmî reyde têkildar o. Na çarçewa de rayîrê Riha de do darê ke kêmî awe wazenê bêrê ronayene.

Do rayîrê mabênê Seyrantepe-Karaçali bêro sererastkerdene

Rayîrê Amed-Farqînî de Seyrantepe ra heta Karaçali, do xebata peyzajî bêro kerdene. Mîyanê projeyî de, rayîrê peyayan, refujê mîyanî û çatrayîrî do bêrê newekerdene û do estetîk bibê. Na xebate de do çend tewirê nebatî ca bigîrê û trafîk do hîna rehet û emnîyetin bibo.

Do rayîrê Mêrdînî bibo modern

Projeyê rayîrê Amed-Mêrdînî bi hawayê şîyayîş-ameyîş pêro pîya 22 kîlometreyî yo, cayê keskî û awanî ra do bêro meydan.

Na xebate de do rayîrê bisîkletan, kemerê keskî û platformê rayîrşîyayîşî zî ca bigîrê. Bi qedîyayîşê na xebate do rayîrê Amed-Mêrdînî bibo hîna modern.