Mudirîya Pêroyî ya DÎSKÎ ya Şaredarîya Amedî ya Şaristanê Girdî, problemê awa şimitişî ke wextê varayîşanê girdan ê Qezaya Pasûrî de benê, bi pakerdişê di ûnîteyanê Tesîsê Awguznayîşê Awa Şimitişî resna çareserîye.

Mudirîya Pêroyî ya DÎSKÎ, seba ke vilakerdişê awa şimitişî ya pake temîn bikero, xebatanê xo dewam kena. DÎSKÎ merkezê şaristanî ra teber qezayan de problemanê awa şimitişî yê demserrî cayê xo de tesbît kena û çareserîyan peyda kena.

Serekîya Daîreya Mintiqaya 1. ya Tesîsan a Mudirîya Pêroyî ya DÎSKÎ, goreyê waştişanê şarî, netîceyê kontrolan de ke aşmanê vîyarteyan Pasûr de ameybî kerdene, problemê ke awa şimitişî de wextê varayîşanê girdan de vejîyenê, tesbît kerdî. Seba ke nê problemî bêrê wedarnayene, di ûnîteyê îlaweyî Paket Tesîsê Awguznayîşê Awa Şimitişî yê Pasûrî de ameyî akerdiş. Bi sîstemê fîltrasyonê neweyî, qeza rê awa şimitişî ya bêvindertene, bi kalîte û bêtehluke do bêro temînkerdene.

'Ma di fîlterî ronayî'

Serekîya Daîreya Mintiqaya 1. ya Tesîsan ra Muhendisê Cugehî Serhan Canî ke derheqê xebate de melumat da, va: "Paket Tesîsê Awguznayîşê Awa Şimitişî ke awa xame ke çimeyê Gelîyê Qasa ra yena awguzneno û qeza rê awa pake temîn keno, seba ke lêminîye mîyanê awe ra wedaro, dekewtbî fealîyet. Ancax, tesîrê vurnayîşê îklîmê globalî reyde bi taybetî varayîşanê şîdetînan ke hawza çimeyê awe ser kewena, bîyî sebebê xirabiyanê girdan ke kalîteyê awa xame de vejîyayî. 

'Ûnîteyî do sanîyeyêk de 50 lître awe biawguznê'

Canî ke qeyd kerd her di ûnîteyî sanîyeyêk de pêro pîya 50 lître awe do biawguznê, va ke bi na xebate, bi taybetî wextê varayîşan de awe bi hawayêko aktîf bêro awguznayene û do merkezê qeza rê bêro dayene.