Şaredarîya Amedî ya Şaristanê Girdî, seba averberdişê xizmetanê astengdaran do bi xebatêka ke do17 şaredarîyanê qezayan reyde pîya îdare biko, Xerîtaya Astengdaran awan bikero.

Serekîya Daîreya Xizmetê Astengdar û Pîran, wexto ke xizmetê xo yê şarê astengdaran dewam kena, seba Projeyê Xerîtaya Astengdaran xebate daye destpêkerdene. Derheqê projeyî de, bi koordînasyonê Şaredarîya Şaristanê Girdî, Merkezê Kultur û Kongre yê Çand Amedî de, beşê eleqedarê 17 şaredarîyanê qezayan reyde kombîyayîş ame kerdene. Şaredarîya Şaristanê Girdî, seba ke xizmetêko hîna başêr bido şarê astengdaran, do bi xebatêka 17 şaredarîyanê qezayan reyde pîya Xerîtaya Astengdaran awan bikero.

'Hedef o yo ke xo biresnê 230 hezar astengdaran'

Serekê Daîreya Xizmetê Astengdar û Pîran Îsmaîl Degîrmenciyî ke qiseyê akerdişî kerd, derheqê proje de melumatî dayî beşdaran. Degîrmenciyî ke dîyar kerd xebatî çarçewaya Planê Stratejîk yê 2025-2029 û Planê Bicaardişê Resayîşî de ramnenê, wina qisey kerd: "Ez wazena ke na xebate ke do mîyanê tirkîya de bibo modelêk, xêyrên bo. Çarçewaya xebatanê Planê Stratejîkî yê 2025-2029 de, goreyê hedefe ma ma xo resnenê 230 hezar astengdaran. Seba ke bi hawayêko aktîf, bibereket û raşt bixebitîyê, ma winasîn projeyêk ard meydan. Ma her tim dîyar kerdbî ke xebatêka winasîne heta tesbîtkerdişê hewcedarîyan zî elzem o."

Do xebata saha bêro kerdene

Çarçewaya proje de, personelê Şaredarîya Şaristanê Girdî û şaredarîyanê qezayan do şêrê keyeyan, kesanê astengdaran tesbît bikerê û anketan virazê. Çarçewaya Projeya Xerîtaya Astengdaran de, personelî ke her şaredarî de xebitînê, do bi formê xerîtaya hewcedarîyan ke amade bîya, xebata saha biramnê. Datayê ke do kom bibê, do aşmane depoyanê Serekîya Daîreya Xizmetê Astengdar û Pîran de bêrê kerdene. Amanc o yo ke na proje 3 serran de bêro temamkerdene û Xerîtaya Astengdaran bêro awankerdene.

Proje do piştî bido averberdişê xizmetan

Proje de do hûmara şarê astengdaran yê bajarî, vîlabîyayîşê hereme, halê astengdarîye, melumatê îstîhdamî û perwerdeyî bêrê tesbîtkerdene. Proje do piştî bido averberdişê xizmetanê astengdaran û afatan, rewşanê lezabez û muhtemelê ecêban de mudaxeleyê lezan.