Hemşaredara Şaredarîya Amedî ya Şaristanê Girdî Serra Bucak 8ê Adare Roja Cinîyanê Kedkaran a Dinya de beşdarê mîtîngî bîye ke Meydanê Îstasyonî de ameyî organîzekerdene, û va: "Ma do aştî pîya biqîrê."

Amed de 8ê Adare Roja Cinîyanê Kedkaran a Dinya, Meydanê Îstasyonî de mîtîngêk reyde pîroz bî. Cinîyanê ke vera AZC Plaza de ke Semta Ofîsî de yo, bi cil û belgan reyde ameyî têhet, bi zirne û sloganan kornej viraşt û heta Meydanê Îstasyonî rayîr şîyî. Cinîyan, bi pankartanê xo bala şarî ante şîdetê camêrdan û polîtîkayan ser o ke cinîyan înkar kenê.

Kornejî de Hemşaredara Şaredarîya Amedî ya Şaristanê Girdî Serra Bucak û hemşaredaranê qezayan zî ca girewt. Hemşaredare Bucak cinîyan reyde rayîr şîye û beşdarê mîtîngê Meydanê Îstasyonî bîye. Cayê mîtîngî de Hemşaredara Şaredarîya Şaristanê Girdî Serra Bucak û hemşaredarê heme şaredarîyan ameyî dawetkerdene sahne ser. Hemşaredaran ke silam da şarî, bi çepik û zirneyan ameyî pêşwazîkerdene.

Hemşaredaran sahne ser o endamanê Meclîsê Mayanê Aştîye reyde borani firnayî û waşt ke 8ê Adare bibo wesîleyê aştîye.

Hemşaredare Serra Bucak ke mîtîngî de qisey kerd, nê cumleyan reyde cinîyan silam kerd: "Cinîyê xoverdayoxê Amedî, merheba, mayanê xoverdayoxê ke bi serran o hêvîya aştîye misqalêk zî vîndî nêkerdê, merheba. Merheba, cinîyê xoverdayoxê ke keye de, kar de, mekteb de, kûçe ra, qebûl nêkenê ke şîdet û îstîsmarî rê sere ronîyo, merheba."

'Hemparîya cinîyan gird bena'

Hemşaredara Bucak bale ante ke têkoşînê organîzebîyayîşê cinîyan û hemparîya înan her ke şono hîna gird beno, û wina va: "Ma zaf şa yê ke 8ê Adare de pêroyê ma tîya dê. Ma sey hemşaredarê cinî yê Şaredarîya Amedî ya Şaristanê Girdî û şaredarîyanê qezayan, silam û heskerdişê xo şima rê kenê. Ma keyfê serfirazîye gênê ke ma şima reyde tîya de yê, baş o ke şima estê."

Aştîya daîmî û şerefdare

Hemşaredara Bucak, qalê vengdayîşê 27ê şibate kerd ke derheqê çareserkerdişê meseleyê Kurdan de ame îlan kerdene, û wina qisey kerd: "Welat de vengdayîşê aştî, yê komelê demokratîkî; pê mumkin o aştî bêro viraştene û ma nêzdîyê aştîye yê. Ma cinî seba ke nê vengdayîşî bikê aştîyêka daîmî û şerefdare, ma ha tîya dd yê, ma Amed de, Êlih de, Wan de, Mêrdîn de yê. Ma do pîya têkoşînê aştîye, vengdayîşê aştîye biqîrê."