Hemşaredara Şaredarîya Amedî ya Şaristanê Girdî Serra Bucak, kombîyayîşê meclîsî yê aşma adare de 8ê Adare Roja Cinîyanê Kedkaran a Dinya yê cinîyan pîroz kerd û va ke rolê ke cinî seba awankerdişê aştî kay kenê û mîsyonê înan muhîm o.

Meclîsê Şaredarîya Şaristanê Girdî, roniştişê xo yê kombîyayîşê asayî yê menga adare kerd. Roniştişo ke bi serekîya Hemşaredara Şaredarîya Şaristanê Girdî Serra Bucak Salona Meclîsî de ame kerdene, endamê meclîsî beşdar bîyî.

Hemşaredare Bucak: Cinî do xurtbîyayîşî reyde dewamê estbîyayîşê xo bikê 

Hemşaredare Bucak ke akerdişê kombîyayîşê meclîsî de qisey kerd, 8ê Adare Roja Cinîyanê Kedkaran a Dinya ya cinîyan pîroz kerd. Hemşaredare Bucak ke dîyar kerd cinî do xurtbîyayîşî reyde dewamê estbîyayîşê xo bikê, wina va: "Ma cinîyanê Amedî reyde, qeza û şaristananê ma de, taxanê ma de, şayîyanê ma de, têhetameyîşanê cinîyan de ma zaf weş û pirr yew bernameyê 8ê Adare eşkera kerd. Helbet mîtîngê Amedî ke ma 8ê Adare de kerd zî, tede meseleya eslî ke vejîyaya orte, seba prosesê ke vernîya ma de yo, ganî ma ci hîra bikerê, gird bikerê û bingeyanê ci birêsnê heqîqetêkî."

'Seba awankerdişê aştî karê ke cinî bikerê, zaf o'

Hemşaredare Bucak ke dewamê qiseyê xo de behsê vengdayîşê heyetê Îmralî yê 27ê sibate kerd, bale ant rolê cinîyan ke do awankerdişê aştîya komelkî de kay bikê. Hemşaredare Bucak ke îşaret kerd wayîrvejîyayîşê vengdayîşê şarê demokratîkî muhîm o, wina qisey kerd: "Tîya de unsuro tewr muhîm, rolê cinîyan o. Nê mîsyon û rolê muhîmî de zî, têkoşînê cinîyan, rêxistinbîyayîşê cinîyan, seba ke ci bikerê serkerwte û seba averşîyayîşê aştî, berpirsîyarîya tewr muhîme ya ma hemînan a. Wa rayîrê ma hemînan akerde bo. Karê ke ma bikerê zaf ê. Sere de cinî û heme şarê ma, karê ke seba awankerdişê aştî bêro kerdene zaf ê. Seba naye ez seba şima hemînan serkewtiş wazena."