Mudirîya Pêroyî ya DÎSKÎ ya Şaredarîya Amedî ya Şaristanê Girdî, bi Tesîsê Awguznayîşê Awa Lêmine ke Bismil de awan kerdo, pê nêverdana Royê Dîcle lêmin bibo.

Tesîsê Awguznayîşê Bîyolojîkî yê Awa Lêmine yê Bismilî ke girêdayeyê Mudirîya Pêroyî ya DÎSKÎ yo, seba pawitişê derûdorî xebatanê xo dewam keno. Tesîso ke 45 hezar metrekare cayî ser o awan bîyo û %85ê ey bi hîbeyê Yewîya Ewropa ameyo viraştene, temîn keno ke awa lêmine bê ke zerar bido derûdorî bêro awguznayîş. Awa lêmine ke borîyanê girdîya 1.200'an ra sistemê kanalîzasyonê Bismilî ra yena tesîsî; azot, fosfor û karbon awe ra yenê awguznayene û awe erşawîyena Royê Dîcle. Bi no hawa awa Dîcle yena pawitene.

Serrane 4,5 mîlyon metrekub awe

Tesîs rojane 12 hezar 500 metrekub û serrane 4,5 mîlyon metrekub awe keno pake. Verê ke awa pake derûdorî rê bêro dayîş, 11 cayanê cîya-cîyayan ra nimûneyî yenê girewtene û kontrol beno ke goreyê standardî ya yan ney.

Tesîsî de 22 personelê pisporan ke muhendîsê derûdorî, muhendîsê elektrîkî û kîmyageran ra yeno meydan, xizmet danê. Nimûneyê ke laborator de yenê muayenekerdene, bi detay analîzê înan yeno kerdene ke goreyê qanûnan ê yan nê. Sîstemê Têqibkerdişê Awa Lêmine (SAÎS) ke Wezaretê Derûdorî, Bajarwanî û Vurîyayîşê Îklîmî mecburî kerdo ke, tayê parametreyê awe ke tesîsî de yena awguznayene bi hawayêko demkî wezaretî rê yenê şawitene.

Cengiz Solmaz ke berpirsîyarê Tesîsê Awguznayîşê Bîyolojîkî yê Awa Lêmine yê Bismilî yo, derheqê xebatan de melumatî dayî û va ke tesîsê winasî seba weşîya şarê herême û pawitişê derûdorî zaf muhîm ê û tesîs seba pawitişê Royê Dîcle û îdarekerdişê çimeyanê awe bi hawayêko dewamkerde xebatanê xo dewam keno. Solmazî va: "Tesîsê Awguznayîşê Awa Lêmine yê Bismilî seba ke vernîya leminbîyayîşê awe ke cuya gandaran tehdît kena bigîro, Royê Dîcle paweno."