Hemşaredarê Şaredarîya Amedî ya Şaristanê Girdî Dogan Hatun, beşdarê nawitgehî bî ke tede fotografê pîrozkerdişê Newroze yê serranê vîyarteyan ê Îran, Iraq, Surîye û herême ca gênê.

Nawitgehê Fotografanê Newroze ke hetê Serekîya Daîreya Kultur û Karanê Sosyalan a Şaredarîya Şaristanê Girdî ra ameyo organîzekerdiş û hetê Komela Hunerê Fotografî ya Amedî (DİFAK) ra pişti dîyayo, Galerîya Merkezê Kulturî Çand Amedî de hunerhesan reyde ame têhet.

Hemşaredar Hatun, nawitgehî ra gêra û Sereka Daîreya Kultur û Karanê Sosyalan Zeynep Yaş ra derheqê fotografan de malumat girewt. Hemşaredar Hatun qiseykerdişê xo de bale ant ke badê heşt serran fotografê Newroze reyna yew nawitgehî de ca gênê. Ey va: "Nawitgehê ma do aşmêk akerde bo. Fotografê ke mojnenê ke senî Newroze ameya pîrozkerdiş, ma Amed de nawitgehê xo de ardê têhet."

Programî de Hemşaredar Hatunî reyde, Emîne Akin û Abdulselam Înceoren ke Hemverfekê Meclîsê Şaredarîya Şaristanê Girdî yê, zî beşdar bîyî.