Hemşaredara Amedî ya Şaristanê Girdî Serra Bucak, resepsîyonê Newroze de va: "Bêrê ma meşte meydanan de nê hemparî, pîyabîyayîş û vengdayîşê aştî bikê gird."

Pêşengîya Platformê Pawitişê Bajarî û Hemparîya Amedî de, Qesra Cemîlpaşayî de resepsîyonê Newroze ame organîzekerdiş. Resepsîyonî de Hemşaredarê Şaredarîya Şaristanê Girdî Serra Bucak û Dogan Hatun, Hemserekê Pêroyî yê DEM Partî Tulay Hatîmoğullarî û Tuncer Bakirhan, parlementerê DEM Partî û CHP’yî hemşaredarê şaredarîyan û heyetê teber ra ameyî beşdar bîyî.

Hemşaredare Bucak va ke 27ê Sibate de vengdayîşêko muhîm ameyo kerdiş û muhîm o ke no vengdayîşê aştî bêro caardene. A va ke 8 serranê peyênan de polîtîkaya qeyyûmî ameya tetbîqkerdene û domna: "Ganî destê tetbîqkerdişê qeyyûmî ra û darbeyê sîyaseto herêmkî, operasyonan û wesayetê huqûqî ra bêro fekveradayene."

Bucak qiseykerdişê xo wina qedêna: "Newroze seba ma xoverdayîş o, têkoşîn o, aştî ya, azadî ya. Bêrê ma meşte meydanan de nê hemparî, nê pîyabîyayîş û vengdayîşê aştî bikê gird."

Badê mesajê Serekê Pêroyî yê CHP Ozgur Ozelî, bi pêşengîya Mayanê Aştî adirê Newroze ame veşnayene.