Hemşaredarê Şaredarîya Amedî ya Şaristanê Girdî Serra Bucak û Dogan Hatun, Wekîlê Serekê Meclîsî û Parlamenterê DEMî Sirrî Sureyya Onderî ke badê vîyarnayîşê krîzê zerrî emelîyat bîyo û kewto odaya pawitişê awarte, zîyaret kerdî.
Tedawîyê Wekîlê Serekê Meclîsî û Parlamenterê Partîya Seypêyîya Şaran û Demokrasîye (Partîya DEM) yê Îstanbulî Sirrî Sureyya Onderî ke krîzê zerrî vîyarnabî, badê emelîyatê ke 12 saetan dewam kerdo, odaya pawitişê awarte de kewto roja çarine. Seke ameyo îfadekerdene ke xetereyê ganî yê Onderî dewam keno, Hemşaredarê Şaredarîya Şaristanê Girdî Serra Bucak û Dogan Hatun, Nêweşxaneyê Florence Nightingale de Onder zîyaret kerd.
Hemşaredaran ke nêweşxane de parlamenteranê Partîya DEMî û endamanê keyeyî reyde sohbet kerd, derheqê rewşa weşîye ya Onderî de melumat girewtî û waştişê şîfa îfade kerd.
