Hemşaredara Şaredarîya Amedî ya Şaristanê Girdî Serra Bucak, beşdarê kombîyayîşê Heyetê Îdareyî yê Ajansa Averberdişî ya Qerecedaxî bîye.

Kombîyayîşê Heyetê Îdareyî yê Ajansa Averberdişî ya Qerecedaxî, awanîya xizmetî ya ajansî ya Amedî de virazîya. Kombîyayîşî de Hemşaredara Şaredarîya Amedî ya Şaristanê Girdî Serra Bucak reyde Walîyê Amedî Murat Zorluoglu, Walîyê Riha Hasan Şildak, Şaredarê Riha yê Şaristanê Girdî Mehmet Kasim Gulpınar, Serekê Odaya Tîcaret û Sanayî ya Amedî (DTSO) Mehmet Kaya, Serekê Odaya Tîcaret û Sanayî ya Riha Mehmet Yetim û Sekreterê Pêroyî yê Ajansa Averberdişî ya Qerecedaxî Yunus Çolak beşdarê ci bîyî.

Kombîyayîşî de ke xebatê viraştişê Jeoparkê Neteweyî yê Qerecedaxî ameyî qiseykerdiş, seba endamîya Qeleya Zerzewan û ca yê volkanîkî yê Qerecedaxî reyde Şebekeyê Jeoparkê Globalî yê UNESCO'yî û xebata amadekarî ameyî erjnayene.

Kombîyayîşî de reyna qerar ame girewtene ke Projeyê Merkezê Şinasnayîşê Turîzmê Dîjîtalî yê Riha ke hetê Walîtîya Riha ra ameyo hazirkerdiş û Projeyê Pêtbîyayîşê Potansiyelê Turîzmî yê Girê Çayonu ke qezaya Erxenî ya Amedî de hetê qaymeqamîye ra do bêro tetbîqkerdiş, piştgirîya ey bêro dayene.