Mudira Şûbeyê Weşîya Awe û Pawitişê Hewzayanê DÎSKÎ Gulcan Yalçin Tantekin va ke Planê Pawitişê Hewzaya Bendawê Dîcleyî, ke %93ê awa şimitişî ya Amedî temin keno, seba heme dezgehan wayîrê hêzê huqûqî yo.

Bendawê Dîcleyî, ke 14ê tebaxe 2024î ra nat bi "Planê Pawitişê Hewza" yeno pawîtiş, 634 km² ca gêno û 53 taxe û 65 mezrayan gêno xo mîyan. No plan, qezayanê Pîran û Gêlî de yo.

Bendawo ke 2001î ra nat %93ê awe temin keno, demê peyênan de vera tehqîbê zêdebîyayîşê awanîyan, faalîyetê ziraetî û heywandaran de mendo. Planê Pawitişê Hewza 14ê tebaxe 2024î de Wezaretê Ziraet û Daristanan ra ameyo qebulkerdiş.

Tantekin va ke, no plan teyna yew belge nîyo, seba dezgehanê resmîyan, şaredarîyan û şîrketanê taybetîyan wayîrê hêzê huqûqî yo. Planî de çar qadê pawitişî ameyê naskerdene: Qada Mutleq (0-300 metre), Qada Nezdî, Qada Mîyanêne û Qada Dûrî. Her qade rê qaydeyê xususîyî est ê.

Tantekin qeyd kerd ke hazirîya planî 2021î de dest pêkerdo. Hazirkerdişê planî de şarê herêmî zî beşdar bîyo. Badê ke taslaxa planî ameya hazirkerdene, uca ra 30 rojî mendo û fikrê şarî û dezgehan ameyo girewtiş.

Analîzan de tehqîbê serekeyî sey şuxulnayîşê dermananê zîraetî û gûbreyê kîmyewî, xebatê heywandarî yê bêkontrolî, awanî, pûçkerdişê ganê keyan û arêdayîşê qirêjîyan vejîyayî meydan.

Tantekin va ke plan, 17ê Adara 2025î de bi beşdarîya hemşaredaranê Amedî ya Şaristanê Girdî Pîran de bi yew beyanatê çapemenî ameyo parekerdiş.

Tantekin qeyd kerd ke kontrolîîan êdî dest pêkerd. Qada Mutleq (0-300 metre) de çi awanî nêyenê dayene. Xebatê zîraetî, heywandarîye û înşaatî tena bi krîteranê taybeyan û destûran eşkenê bêrê kerdene. Demo ke xebatêka vera planî ame tespîtkerdiş, verê zabitnameyo îdarî yeno tepiştiş, dima nê zabitnameyan îdareyê eleqedaran (sey şaredarî yan îdareyê derûdorî) rê yenê erşawitiş.